Ukuhlaselwa kwezizalwane zakwamanye amazwe kwele South Africa kukhanya sekuphelile edolobheni le Johannesburg,emizini eqoqela i Alexandria, Thembisa leminye, kodwa kubikwa sokuqhamuke e Durban. Uhulumende wesouth africa usethembise ukuqeda loluhlupho ngokubopha bonke abamemethekisa loludlakela. Umkhokheli webandla le ANC Umnumzana Jacob Zuma loMongameli Thabo Mbeki bayavumelana ukuthi ibutho lakulelo lizwe sokumele lingenele ekuqedeni loludlakela.
Kodwa inhlanganiso ezimbalwa zase South Africa sezisole lesisehlakalo. Eyinye yalezi yinhlanganiso yabahlala emikhukhwini ebizwa ngokuthi Abahlali Basemijondolo ethi uhulumende we South Africa kumele athathe amanyathelo aqinileyo okuqeda loluhlupho hatshi ukuthembisa kuphela. layo isola kakhulu ukuhlukuluzwa kabavela kwamanye amazwe isithi umuntu wonke emhlabeni ulelungelo lokuhlala elizweni alifunayo.
U Brenda Moyo weStudio 7 ukhulume loMnumzana Timothy Rukombo unobhala wecele le MDC elikhokhelwa nguMnumzana Morgan Tsvangirai KwaZulu Natal obephakathi kokudinga izizalwane zeZimbabwe ezehlelwe ludubo lokuhlukuluzwa e Durban. URukombo uthi namhla laye uphose wawela emlonyeni wesilwane.