Abasekeli bebandla leMDC ababili babikwa befele emlilweni olumathe ehofisini yeMDC ngemva kokujikelwa ibhomba lepetulo eJerera Growth Point eZaka esigabeni seMasvingo izolo ebusuku.
Unobhala wesigaba lesi, uMnu. Tongai Mathuthu utshele iStudio 7 ukuthi amanye amalunga ebandla lakhe ambalwa asinde kulingozi kodwa alimele okwesabekayo. UMathuthu uthi bacabangela ukuthi abantu abaphosele lelibhomba ngamasotsha kade ehamba labasekeli beZanu PF.
Inengi labasinde kulingozi babikwa bebecatshele udlakela oselusabelele kulumango. Kuthi eMhangura esigabeni seDoma kubikwa kubulewe amalunga eMDC ayisikhombisa. Kodwa iStudio 7 yehlulekile ukuthola ubufakazi balokhu. Kumbiko esiyitholileyo abantu laba babikwa befe ngemva kokulwisana kwabasekeli beMDC leZanu PF okumangalisayo.
Ekuqhubekeni kodlakela elizweni uMnu. Jim Holland umka nkosikazi Sekai Holland isiphathamandla seMDC uke wathunjwa zinsoli zikahulumende eHarare lamuhla ekuseni. U Holland ubikwa ebuzisiwe zinsoli lezi okwamahola amathathu wasekhululwa. Isiphathamandla seZanu PF, uMnu. Joram Gumbo, olilunga ledale elimqoka laleli bandla ipolitburo, utshele uChris Gande weStudio 7 ukuthi amalunga eMDC lawo alobudlwangudlwangu kodwa intathelizindaba kazibuvezi lobu budlwangudlwangu zikhetha ukuveza obeZanu PF.