Isivuno salonyaka sehlile nxa siqathaniswa lesanyakenye, okutsho ukuthi ilizwe lizaqhubeka libhekane lendlala embi, kubika i Food and Agricultural Organisation (FAO) kanye leWorld Food Programme (WFP).
Egwalweni ezilwethule
lamuhla inhlanganiso lezi zithi lonyaka kuzatholakala amathani phose
inkulungwane ezingamakhulu ayisithupha - 575 000 kuphela omumbu. Nyakenye kwatholakala
inkulungwane ezingamakhulu athoba minwe mbili zamathani - 800 000. Inhlanganiso lezi zithi imbangela emqoka yokusilela kokudla yikuthi abalimi abahlaliswa emapulazini phansi kohlelo lukahulumende lokwaba kutsha kutsha umhlabathi, kabasebenzisi umhlabathi abawuphiwayo ngokugcweleyo. Umsekeli kaMongameli welizwe, UNkosikazi Joyce Mujuru ubikwa laye esole abalimi laba izolo ngokungalimi ukudla okunengi.
Zithi njalo ekuqaleni komnyaka ozayo izigidi ezinhlanu zabantu zizabe sezifuna uncedo lokudla. Ngalokhu inhlanganiso lezi zikhuthaza uhulumende ukuthi evumele amankampani azimeleyo ukuthi athenge umumbu kwamanye amazwe njalo ekhulumisane lenhlanganiso ezipha uncedo lokudla ziqhubekele phambili ngokwabela abalambayo loluncedo.
Ingcwethi kwezokulima uMnu Renson Gasela utshele uNtungamili Nkomo weStudio 7 ukuthi ngempela ilizwe libhekane lendlala, kodwa uthi ngobuqholo bukahulumende kaMugabe kaboni elandela inkuthazo yenhlanganiso lezi.
