amalinks wokungena

Breaking News

I UN Ilakho Ukujezisa UMugabe Labangane Bakhe


Umanyano weAfrican Union ukhangelelwe ukuthumela umgcinisihlalo wawo uMnu Jakaya Kikwete loMnu Jean Ping ongumgcinisihlalo we African Union Commission, eZimbabwe kumaviki ambalwa azayo ukuthi bayekhulumisana lomongameli Robert Mugabe, umkokheli weMDC uMnu Morgan Tsvangirai lomongameli Thabo Mbeki weleSouth Africa emizameni yokulungisisa udaba lweZimbabwe.

I African Union ibikwa idabukene phakathi ekuthini udaba lweZimbabwe lulungisiswe njani, njalo amazwe afana leBotswana, Nigeria, Sierra Leon lamanye abikwa ekhuthaza ukuthi kwenziwe ukhetho olutsha ngoba engananzi uMugabe njengo mongameli.

Ekhuluma leStudio 7 lamuhla umkhokheli weMDC uMnu Tsvangirai uveze ukuthi ube lomhlangano labameli bamazwe eAfrica eZimbabwe lamuhla ebachasisela ngalokhu iMDC efuna iSadc leAU zikwenze ukuze kulungisiswe udaba lweZimbabwe. Inhloko kahulumende weleBhilithani uMnu Gordon Brown laye wethule amazwi okuthi ilizwe lakhe lisekela imbiko yokuthi kuthunyelwe ibutho lokulondoloza ukuthula eZimbabwe.

Ekhuluma edaleni lephalamende uMnu Brown uthe umhlaba kumele usebenze ndawonye leMDC uzwe ukuthi lelibandla lithi udaba lweZimbabwe lungalungisiswa njani. Ngakwelinye icele, iMelika lamuhla yethulele okusemthethweni iUnited Nations Security Council ugwalo olulezijeziso efuna iUnited Nations izethulele eleZimbabwe.

IMelika ifuna iUnited Nations ijezise umongameli Mugabe leziphathamandla zebandla lakhe ezilitshumi lambili ezigoqela usibalukhulu webhanga elikhulu uMnu Gedion Gono, uMnu Augustine Chihuri, Patrick Chinamasa, Dydimus Mutasa, George Charamba, Paradzai Zimondi, Happyton Bonyongwe, David Parirenyatwa, Perence Shiri, Constatine Chiwengwa loMnu Emmerson Mnangagwa.

Zingethulwa lezizijeziso zizakuba yizijeziso zakuqala ezeUnited Nations phezu kweZimbabwe. I United Nations Security Council ikhangelelwe ukuhlaziya ugwalo lolu ngoLwesibili kuviki ezayo.

Ukuze sizwe ukuthi kambe iUnited Nations ilakho ukuvuma ukujezisa uMugabe lokuthi izijeziso lezi zingaphathisa njani, ingcwethi ecubungula ezombusazwe uMnu Rejoyce Ngwenya, utshele uNtungamili Nkomo weStudio 7 ukuthi kazisoze zincede ngalutho.

Ezinye Indaba ZeStudio 7...

XS
SM
MD
LG