Amalunga ebandla leMDC awabaleka emizini yabo esesaba udlakela lwezombangazwe asebuyela emizini yawo abikwa ehlawuliswa imali zinduna labasobhuku abasekela iZanu PF. Inengi lalabo ababaleka ezigabeni zemashonaland bathi bathole izifuyo sezadliwa ngamalunga ebandla leMDC.
Emadolobheni lanxa udlakela selwehlile abantu babikwa belokhu bethukuthele ukwethuselana kwabasekeli bebandla lemdc lezanu kulokhu kuqhubekela phambili lanxa inkulumo zokuxazulula inkinga eselizweni seziqalisile.
Obona ngokuqutshwa kwenhlelo zebandla leMDC uNkosikazi Sekai
Holland utshele uChris Gande weStudio 7 ukuthi ukuqalisa kwenkulumo
zokuxazulula inkinga yezombusazwe akulethanga nguquko ngoba sekulolunye uhlelo
lokubopha abasekeli bebandla lakhe oluthiwa operation wathunywa ngubani.
UHolland uthi usebuyele njalo ekucatsheni ngemva kokulandelelwa yimota eyahe yasetshenziswa ukuthumba umkakhe.
Kunjalo nje, ibandla leMDC lithi amalunga alo abotshiweyo alokhu ethwaliswe nzima eamjele elizweni lonke. Lelibandla lithi amanye amalunga asezenelisa inyanga ezintathu elokhu evalelwe.
Owakhethwa ukumela isigaba semzingwane edaleni lephalamende, uNkosazana Nomalanga Khumalo utshele uChris Gande weStudio 7 ukuthi kuyamangalisa ukuthi uhulumende engabe elokhu evalele laba bantu kohona sekulenkulumo phakathi kwenkokheli yamabandla ezombusazwe.
