Usibalukhulu webhanga elikhulu lelizwe uMnu Gideon Gono lamhla wesule amazero alitshumi emalini yakuleli, okutsho ukuthi imali engange Z$10 billion dollars isizakuba yi Z$1.
Esethula iziqondiso zakhe zemali (I monetary policy), uGono wazise njalo ukuthi iReserve Bank of Zimbabwe (RBZ) izakwethula imali entsha ezaqala ukusebenza ngoLwesihlanu.
UGono wengezelela njalo inani lemali esizathathwa ngabantu emabhanga ngelanga isuka u Z$100 billion isiya ku Z$2 trillion dollars. Intatheli yethu uMark Peter Nthambe ube khona uGono esethula iziqondiso zakhe eHarare wasethulela lolu daba.
Uzulu yena ubekhalakhala ngemali ekade esenelisa ukyikhipha ebhanga ngelanga le ngoba esithi ayithengi lutho nanku into sezidula okwamagama.
Ngomnyaka ka2006 uGono uke wesula abanye njalo ozero emalini kulandela ukukhonona kwabamabhizimusi kanye labamabhanga besithi ozero laba basebebanengi kakhulu njalo bebengakwani kuhle emitshineni yabo yama computer. Lamuhla uthethe inyathelo elifanayo ngoba besebephendukile sebebanengi kakhulu emalini.
Ingcwethi ezicubungula ezenotho uMnu Clemence Sibanda utshele uBrenda Moyo weStudio 7 ukuthi okwenziwe nguGono akusoze kulethe nguquko kwezenotho, esithi ukulethwa kwemali entsha kuzaphazamisa uzulu ongafundiswanga lutho ngokusebenza kwalimali.
Ezinye Indaba ZeStudio7...
