Uzulu weZimbabwe uthi imali yephepha ebambeneyo elesisindo senkulungwane yamadollar, i$1000 eyethulwe libhanga elokhulu lelizwe i Reserve Bank of Zimbabwe ngolweSithathu ayizukunceda ngalutho, ngoba isenela ukuthenga iziwitsi kuphela. IRBZ yethule limali ngolweSithathu njalo uzulu usevunyelwa ukuthatha inkulungwane yamadollar-$1000 emabhanga ngelanga. Igcwethi kwezenotho zisola lelinyathelo zizethesa usibalukhulu webhanga elikhulu lezizwe uMnumzana Gideon Gono umlandu wokuqhubeka ebhidliza inotho yelizwe.
UBrenda Moyo WeStudio 7 ukhulume loNkosikazi Shailet Ndebele ohlala emzini weKingsdale koBulawayo, othi i$1000 ayisimali yalutho.
UBrenda Moyo uphinde wakhuluma loMnumzana Patrick Moyo ohlala emzini weNkulumane othi ibhanga elikhulu lelizwe kumele livumele abantu ukuthi bathathe imali abayifunayo emabhanga, ngoba inkulungwane yamadollar abantu asebevunyelwa ukuyithatha ilutshwana kakhulu, njalo ingasathengi lutho.
Ezinye Indaba ZeStudio7...
