Ibandla leMDC lamuhla likhuthaze umanyano wamazwe angezansi kwezwekazi le Africa i Sadc ukuthi ungenele ngokuphangisa uzelamula umbango okhona phezu kodaba lokwabelana izikhundla zedale lecabinet phakathi kwalo leZanu PF.
Ibandla leli liphinde njalo lalandula imibiko ethulwe liphephandaba likahulumende i Herald ebisithi inkulumo ngodaba lwezikhundla lolu bezizaqhubekela phambili lamuhla.
IMDC silandule njalo ukuthi sokusele
ingatsha ezimbili kuphela ku cabinet okungakavunyelwana ngazo.
Isikhulumi sikaMugabe uMnu George Charamba wethule umbiko ngemva komhlangano phakathi kukaMugabe, uMorgan Tsvangirai loArthur Mutambara ngoMgqibelo esithi abakhokheli laba bavumelene ekwabiweni kwengatsha ezinengi kwasala ezimbili kuphela, olwemali lolwendaba zaphakathi kwelizwe.
Kodwa iMDC iyakulandula lokhu isithi zinengi ingatsha okungakavunyelwana ngazo. Isikhulumi seMDC ekhokhelwa nguMnu Tsvangirai uMnu Nelson Chamisa utshele iStudio 7 ukuthi sebefuna umanyano weSadc ungenele uzelamula lumbango.
IZanu PF ibikwa ingafuni lengatsha ezimqoka ezigoqela olwemali, olwendaba zaphakathi kwelizwe, olwembuso yezabelo, olwendaba zokulima kanye lolwendaba zaphandle kwelizwe.
UChamisa uveze njalo ukuthi udaba lwabosibalukhulu bezabelo lalo kalukalungisiswa. Ngalokhu, uthi ibandla lakhe lifuna i Sadc ithumele umlamulankunzi kudaba lweZimbabwe uMnu Thabo Mbeki angenele.
UMnu Sam Sipepa Nkomo yisiphathamandla seMDC kaTsvangirai. UNkomo uthi ibandla leZanu PF alizinikelanga kuhulumende womanyano lo yikho nje lingafuni ukuthi linikeze ibandla lakhe ingatsha ezimqoka.
Kunjalonje, ingcwethi ecubungula ezombusazwe uMnu Rejoyce Ngwenya uthi kuyadanisa ukuthi amabandla la alokhu edonselana phezu kodaba lwezikhundla uzulu ethwele gadalala.
