amalinks wokungena

Breaking News

Uhambo LukaTsvangirai KweleFrance Engela Passport  Lucunula UMugabe


Umkhokheli welinye lamacele eMDC uMnu Morgan Tsvangirai, osekwethekeleleni kwele France okwamanje ubikwa eye khulumisana lomanyano weEuropean Union, ecela ukuthi wengezelele uncedo lokudla alupha uzulu weZimbabwe ukuthi kuqedwe indlala ekhona.

Isikhulumi sikaTsvangirai uMnu George Sibotshiwe utshele iStudio 7 lamuhla ukuthi uTsvangirai uye kwele France ngemva kokuba enxuswe nguMongameli walelo lizwe uMnu Nicholas Sarkhozy ukuthi aphatheke emhlanganweni omkhulu owe European Development Days summit wona oqale ngoMgqibelo njalo ophela lamuhla.

USibotshiwe uthi uTsvangirai uthethe ke ithuba leli ukuthi akhulumisane lenkokheli ye EU kulumhlangano ecela ukuthi yengeze uncedo lokudla elupha iZimbabwe. Kusasa uTsvangirai ubikwa ezahlangana loMongameli Sarkozy, ongumgcinisihlalo we European Union.

Esuka kwele France uTsvangirai ubikwa ezadlulela eTanzania lapho azakhulumisana khona loMongameli walelo lizwe njalo engumgcinisihlalo we African Union (AU) uMnu Jakaya Kikwete ngodaba lweZimbabwe.

Abazi ngokwenzakala kubandla leZanu PF batshele iStudio 7 ukuthi uhambo lukaTsvangirai lucunule kakhulu uMongameli Mugabe. UMugabe ubikwa ecatshulwe kakhulu yikuthi uTsvangirai wenelise njalo ukuthi aye eFrance yena engelancwadi yokuhambisa i passport.

USibotshiwe uthi uhambo lukaTsvangirai luphumelele laloba engela passport ngoba beluqoqwe ngumkhokheli weFrance njalo kube lokukhulumisana lamanye amazwe. Ingcwethi ecubungula ezombusazwe uMnu Daniel Molokele uthi uhambo lolu lulakho ukwengezelela ukufuthelana okukhona phakathi kwebandla lakhe lebandla leZanu PF.

Ezinye Indaba ZeStudio 7...

XS
SM
MD
LG