Inhlanganiso yomanyano wamazwe womhlaba oweUnited Nations, ucele inhlanganiso ezipha
uncedo ukuthi ziphathise ngemali engange zigidi ezingamakhulu amahlanu lamatshumi amahlanu amadollar eMelika, iUS$ 550 million ezaphathisa
ukuhlenga uzulu weZimbabwe endubekweni ezimbalwa ezigoqela indlala. Unobhala jikelele
walumanyano uMnumzana Ban Ki-Moon wazise ukuthi i United Nations idinga
njalo amabillion ayisikhombisa amadollar eMelika - US$7 Billion ezaphathisa abantu abadinga uncedo emazweni
atshiyeneyo omhlaba ngomnyaka ozayo ka 2009.
Amanye amazwe ezwekazi leAfrica azathola uncedo lwemali le ingatholakala agoqela iSudan, yona edinga iUS$ 2,2 Billion, iSomalia, iDRC, Kenya, Chad, Uganda, Central African Republic kanye leCote d'iIoire. Amazwe afana le Palestine kanye leIraq ngamanye adinga uncedo. UKi Moon ukhuthaze inhlanganiso ezipha uncedo ukuthi zingathikazi ukuphathisa ngemali edingakalayo, ukuze kuhlengwe izigidi ezingamatshumi amathathu zabantu -30 million emhlabeni jikelele abazafuna uncedo ngomnyaka ozayo.
Inhlanganiso yeWorld Food Program, yona elugatsha lomanyano weUN icele izigidi ezilikhulu lamatshumi amane zamadollar eMelika - US$140 million ngenyanga edluleyo eyokuthengela uzulu weZimbabwe olambayo ukudla, kodwa linhlanganiso ithi ayikakatholi lutho.
UBrenda Moyo weStudio 7 ukhulume lomqondisi wenhlanganiso yeCrisis in Zimbabwe Coalition njalo eyingcwethi ecubungula ezombusazwe umnu Xolani Zitha othi ngaphandle kokusilela kokudla eleZimbabwe lidinga njalo uncedo lokuvuselela ezempilakahle esezibhidlikile.
