Icele leMDC elikhokhelwa nguMnu Morgan Tsvangirai lithi selilobele umanyano weSadc okusemthethweni licela ukuthi umise uMnu Thabo Mbeki ukuba ngumlamulankunzi kudaba lweZimbabwe.
Lokhu kulandela ukukhulumisana kubi phakathi kukaMbeki lecele likaTsvangirai, uMbeki esithi uTsvangirai ukhanya elalela kakhulu into azitshelwa ngamazwe afana leAmerika leBritain.
UMongameli webandla leANC, uMnu Jacob Zuma izolo utshele umsakazo weSabc ukuthi kavumelani lalabo abasola uMbeki emizameni yokuxazulula inkinga yezimbabwe.
Izolo khona iziphathamandla zeZanu PF lezeMDC zisayinelene ugwalo lokuguqula isisekelo sombuso, uAmmendment # 19 osokuphendle indlela yokubunjwa kohulumende womanyano.
Kodwa isiphathamandla secele likaTsvangirai uMnu Sam Sipepa Nkomo uthi lokhu akutsho lutho ngoba ibandla lakhe lingasoze lisekele ukupaswa kwalinguquko edaleni lephalamende nxa uMongameli Mugabe engalungisisanga izikhalazo zabo zonke.
Abecele leMDC elikhokhelwa nguMnu Arthur Mutambara bona bathi yinto ejabulisayo ukuthi kube lokuvumelana izolo phezu kokuguqulwa kwesisekelo sombuso, besithi sebekhangelele ukuthi linguquko ilotshwe kuGovernment Gazette andubana ihanjiswe edaleni lephalamende.
Ngakwelinye icele, isiphathamandla seZanu PF uMnu Joram Gumbo uthi icele likaTsvangirai kumele lifake eceleni izikhalazo zalo okwakathesi lingene kuhulumende womanyano kulungisiswe indubo ezikhona.
Umbono kaGumbo usekelwe yingcwethi ecubungula ezombusazwe uMnu Brilliant Mhlanga yena othi uTsvangirai kumele avume ukungena kuluhulumende kulungisiwe umumo ngoba abantu besebunzimeni obumangalisayo.
Ezinye Indaba ZeStudio 7...
