Iqembu leHighlanders liqhube umhlangano walo weAnnual General Meeting (AGM) izolo kulokufuthelana amalunga aleli qembu efuna ukuzwisisa ukuthi inkokheli yeBosso isebenzise njani imali nyakenye.
Bekulokucabangela okukhulu amanye amalunga esithi inkokheli yaleli qembu ingaba
yatshayela esikhewini imali etholwe yileli qembu ngemva kokuthengisa abadlali abathize abafana loObadiah Tarumbwa. Inkokheli yeBosso ikulandule lokhu.
Kodwa okuvele sobala njalo okuliqiniso yikuti iqembu leli lisenkingeni impela ngoba lilahlekelwe yimali engange US$ 14, 000 ngemva kokubana iziphathamandla zenye inkampani yakwele China ebimele ithungele iqembu amajesi abalandeli zinyamalele lalimali zingathunganga amajesi la.
Iqembu leli likwelede njalo usomabhizimusi
wakoBulawayo uMnu Vusumuzi Dube imali engange US$ 26, 000. UVusumuzi yindodana kaTshinga Dube, umsekeli weBosso omkhulu.
Ilunga le Highlanders u Omega Sibanda yena obekhona emhlanganweni wangeSonto utshele uNtungamili Nkomo ukuthi laloba bekulilungelo labo abalandeli beqembu ukuthi bedingisise ukuzwisisa ngokusetshenziswa kwezimali, ubona ingani bakhona ekade beqophe uMnu Mapepa Sibanda, yena osetshiya isikhundla sokuba ngumgcinisihlalo waleli qembu.
