amalinks wokungena

Breaking News

Ibandla LikaTsvangirai Selingenile Kuhulumende


Sokwenzakele!

Ugatsha lweNational Council kucele leMDC elikhokhelwa nguMnu Morgan Tsvangirai soluvumile ukuthi lelibandla lingene kuhulumende womanyano leZanu PF kanye lecele leMDC ekhokhelwa nguMnu Arthur Mutambara. Ugatsha lolu lwethule isinqumo lesi ngolweSine.

Ngalokhu amalunga edale lephalamende sekhangelelwe ukuthi apase inguquko yesisekelo sombuso, u Ammendment # 19 mhlaka 5 ngenyanga ezayo. Inguquko le icanda ukubunjwa kukahulumende okusemthethweni.

UMnu Tsvangirai uzafungiswa ukuqala umsebenzi mhlaka 11 ngenyanga ezayo kanye labasekeli bakhe uMnu Arthur Mutambara kanye loNkosazana Thokozani Khupe. Abaphathintambo bakahulumende bona bazafungiswa mhlaka 13, lapho uhulumende azaqala khona umsebenzi.

Ugatsha oluzabona ngokusebenza kukahulumende womanyano lo, olwe Joint Monitoring Implementation Committee lukhethiwe ngolweSihlanu lwahle lwaqala ukusebenza. Abakhokhela lolugatsha nguMnu Welshman Ncube, unobhala jikelele weMDC kaMutambara, uMnu Nichholas Goche oweZanu PF kanye loMnu Elton Mangoma oweMDC kaTsvangirai.

UMnu Sam Sipepa Nkomo oweMDC kaTsvangirai uthi laloba sebengenile kuluhulumende, izikhalazo zabo zonke kazikalungisiswa njalo uthi bakhangelele ukuthi zilungisiswe uhulumende sebunjiwe.

Ngakolunye uhlangothi, unobhala jikelele wecele leMDC elikhokhelwa nguMnu Arthur Mutambara uMnu Welshman Ncube uthi ibandla lakhe lamukela ngenjabulo ukungena kwecele lika tsvangirai kuhulumende womanyano.

kunjalo nje ingcwethi ecubungula ezombusazwe uMnu Mlamuli Nkomo uthi mkhulu umsebenzi uhulumende omutsha lo abhekane lawo ngakho kuzamele asebenze gadalala kuqedwe indubo zonke uzulu abhekane lazo.

Ezinye indaba zeStudio 7...


XS
SM
MD
LG