amalinks wokungena

Breaking News

Kuqhamuka Ukukhulumisana Kubi Phakathi KweZanu PF LeMDC


Kungakedluli leviki icele leMDC elikhokhelwa nguMnu Morgan Tsvangirai livumile ukungena kuhulumende womanyano leZanu PF kanye lecele elikhokhelwa nguMnu Arthur Mutambara, sokuqhamuke ukukhulumisana kubi, icele lika Tsvangirai lisethesa ibandla leZanu PF umlandu wokungazinikeli ekubunjweni kukahulumende.

Icele likaTsvangirai lethule umbiko lo ngolweSibili emveni kokuba iziphathamandla zeZanu PF zehlulekile ukuya eSouth Africa ukuya phatheka emhlanganweni obujonge ukulungisisa into ezisele zilenga ezifana lodaba lwabosibalukhulu bezabelo kanye lodaba lwabaphathintambo ukuze kubunjwe uhulumende womanyano lo.

Amaqula enhlangothi zombili zeMDC ahambile eSouth Africa kodwa iqula leZanu PF lona alizange lizihluphe. Isikhulumi secele lika Tsvangirai uMnu Nelson Chamisa, embikweni awethule lamuhla, usole kakhulu isenzo seZanu PF lesi esithi siveza sobala ukuthi leli bandla alifuni ukuthi kubunjwe uhulumende womanyano ngokuphangisa njalo kalinanzi inhlupho ezibhekane lozulu weZimbabwe.

UChamisa uthe iqula leZanu PF libazise ukuthi belingeke liye eSouth Africa ngoba uMongameli Mugabe, yena ophatheke emhlanganweni weAfrican Union e Adis Ababa, engaliphanga imvumo yokuthi liye kulumhlangano.

Kodwa okhokhela iqula leZanu PF kunkulumo uMnu Patrick Chimanasa utshele iStudio 7 ukuthi ngamanga aluhlaza tshoko imbiko ekhitshwe licele likaTsvangirai, esithi bona kabayanga kulumhlangano ngoba bebengazi lutho ngawo.

Uthi batshelwe ngawo izolo ebusuku phakathi kwamabili, kungakho behlulekile ukuyaphatheka ngoba bebengazilungiselelanga. Ngalokhu, uthi umhlangano lo uzaqala kusasa ePretoria. Wengeze wathi inguquko yesisekelo sombuso, u Ammendment # 19 ebimele ihlaziywe lidale lephalamende kusasa isizahlaziywa ngeviki ezayo.

ISadc yona ibithe u Ammendment 19 kumele abe sehluzwe walolongwa wethulwa ukuba ngumthetho mhlaka 5 ukuze u Tsvangirai labasekeli bakhe ababili bafungiswe baqale umsebenzi. Ingcwethi ecubungula ezombusazwe uMnu George Mkhwanazi uthi ukusolana okukhona phakathi kweMDC leZanu PF akumangalisi ngoba amacele womabili evele engathembani.

Kunjalo nje, ekhuluma emhlanganweni we African Union, uMongameli Mugabe ukhuthaze amazwe angentshonalanga afana leBritain le America ukuthi esule izijeziso azethulela iziphathamandla zikahulumende wakhe. UMugabe uthe izijeziso lezi yizo ezibangela ubunzima obukhona elizweni.

Kodwa umanyano we European Union wona uthi kawusoze wesule lezi zijeziso, okungamazwi asethulwe njalo ngene Britain. Kodwa amazwe la athi azaqhubeka encedisa eleZimbabwe, ikakhulu uhulumende womanyano engabunjwa.

Ingcwethi ecubungula ezombusazwe uMnu Mlamuli Nkomo uthi izijeziso lezi zizaxabanisa abeZanu PF labe MDC kuhulumende womanyano ngoba kuzabacunula abeZanu PF ukuthi kabenelisi ukwethekelela amazwe angentshonalanga, abeMDC bona basenelisa ukwenza lokhu bengela migoqo.

Ezinye indaba zeStudio 7...


XS
SM
MD
LG