Abaphathintambo ababona ngezemali emazweni eSadc
abagoqela uMnu Tendai Biti owe Zimbabwe, bazahlangana ngolweSithathu eCape Town
kwele South Africa bekhulumisana ngokuthi amazwe eSadc engancedisa njani
eleZimbabwe ukuvuselela umnotho walo.
Ekhuluma leStudio 7, unobhala jikelele weSadc uMnu Tomaz Salomao uveze ukuthi umhlangano lo uzalandelwa ngomunye njalo oweSadc Council of Ministers ngolweSine lapho abaphathintambo bezemali abazakwethula khona izinqumo zabo ekuthini iSadc ingancedisa njani eleZimbabwe lokuthi kufunakala malini.
Uthi njalo umhlangano wangolweSithathu uzahlaziya udaba lokonakala komnotho elizweni jikelele lokuthi amazwe eSadc engazivikela njani. UMnu Salomao wengeze wathi umkhokheli weAfrican Development Bank uMnu Donald Kaberuka laye uzaphatheka kulumhlangano.
Ibhanga leAfrican Development Bank lalo likhangelelwe ukunikeza uhulumende weZimbabwe imali yokuvuselela umnotho.
Behlangana ngolweSithathu eCape Town abaphathintambo
bezemali, unobhala jikelele weUnited Nations uMnu Ban Ki Moon yena uzakuba
ehlangana lomgcinisihlalo weSadc njalo enguMongameli weSouth Africa, uMnu Kgalema Motlanthe ePretoria bebonisana ngokuthi
uhulumende weZimbabwe engancediswa njani ukuvuselela ilizwe.
Lokhu ngokwakuqala ukuthi uMnu Ban ethekelele izansi yezwekazi le Africa selokhu ekhethwe ukuba ngunobhala jikele we United Nations ngo2007. UMnu Ban uthumele iqula lakhe eZimbabwe ngoMgqibelo ukuyahlolisisa ngomumo lokuthi umanyano wamazwe omhlaba ungancedisa njani.
Sikhuluma nje iqula leli liseZimbabwe njalo lizaqeda inhlolisiso yalo ngolweSithathu. Inhloko kahulumende uMnu Morgan Tsvangirai yena ucele amazwe omhlaba izolo ukuthi angenele ancedise eleZimbabwe.
Ekhuluma emhlanganweni webandla lakhe eGweru, uMnu Tsvangirai ukhuthaze njalo ukuxolelana lokubambana. Uthi labo ababulawelwe izihlobo labangane kukhetho olwedlulayo kumele baxole.
