amalinks wokungena

Breaking News

UMnu Bennett Uphiwa Ibail, Kodwa Ulokhu Evalelwe


Umthethwandaba weHarare High Court ngolweSibili unikeze umgciningcebo wecele leMDC elikhokhelwa nguMnu Morgan Tsvangirai, uMnu Roy Benett imvumo yokuthi ahlawuliswe imali yesibambiso. ibail engange US$2000 ukuze akhululwe.

Kodwa umtshutshisi uphange waphikisa isinqumo lesi, okwenze ukuthi uMnu Bennett engaze akhululwa. UTsvangirai yena ubelobele umthethwandaba incwadi ethembisa ukuthi uBennett engakhululwa kasoze abaleke elizweni.

Lokhu kucunule kakhulu umtshutshisi yena othe uTsvangirai kamelanga engenele kudaba lokuthoniswa kuka Bennett. UMnu Bennet wetheswa icala lokutholakala elezikhali okuthiwa wayefuna ukuzisebenzisa ukugenqula uhulumende kaMongameli Robert Mugabe, okulicala alilandulayo.

Igqwetha lika Bennett uNkosikazi Beatrice Mtetwa utshele iStudio 7 ukuthi bayayisola kakhulu indlela amagqwetha kahulumende aphatha ngayo udaba luka Bennett esithi kusobala ukuthi kulezombangwazwe phakathi.

Ibandla leMDC lalo lisole kakhulu amagqwetha kahulumende ngendlela aphatha ngayo udaba lolu embikweni eliwethule ngolweSibili. Umthethwandaba weHigh Court uzahlala njalo ngeviki ezayo uhlaziya udaba lokuphikisa kuka mantshi ukuthi uBennett ehlawuliswe imali yesibambiso.

Igqwetha elilwela ilungelo loluntu uMnu Kucaca Phulu uthi ukubotshwa kuka Bennett kuveza sobala ukuthi uMongameli Mugabe uqhubeka esebenzisa imithethwandaba kanye lamapholisa ukwephula ilungelo loluntu.

Ezinye indaba zeStudio 7...

Okuhambelana lalokhu

XS
SM
MD
LG