Abaphathintambo bomanyano weSadc abaqhubeke ngomhlangano wabo kweleSouth Africa ngolweSine becebisana ngokuthi iSadc ingancedisa njani ele Zimbabwe ukuvuselela umnotho, babika ukuthi eleZimbabwe selicele imali engange US$2 billion emazweni akulumanyano.
Ibhanga leAfrican Development Bank lalo likhangelelwe ukweboleka uhulumende weZimbabwe imali, kodwa ekhuluma emhlanganweni wabaphathintambo beSadc, umkhokheli waleli bhanga uMnu Donald Kaberuka uthe iZimbabwe kuzamele ihlawule isikwelede elaso sayo seUS$460 million kuleli bhanga ukuze inikwe esinye isikwelede.
Wengeze wathi ujabuliswe kakhulu luhlelo luka mphathintambo wezemali eZimbabwe uMnu Tendai Biti olokuvuselela umnotho. Uthi ibhanga lakhe lizimisele ukuncedisa uhulumende womanyano ukuvuselela umnotho.
Ekhuluma emhlanganweni ofanayo umphathintambo obona ngezangaphandle kwelizwe eSouth Africa, uNkosazana Dlamini Zuma ukhuthaze amazwe angentshonalanga ukuthi esule izijeziso azethulele iziphathamandla zika hulumende kamongameli mugabe.
Ukuhlaziya udaba loncedo oludingwa yiZimbabwe sixhume ingcwethi ezicubungula ezombusazwe uMnu Mandlenkosi Gatsheni loMnu Immanuel Hlabangana.
