UMnumzana Roy Bennet owebandla le MDC ukhangelelwe ukukhululwa entilongweni ngolweSithathu ntambama ngemva kwemizamo kahulumende yokuthi u Bennet engakhitshwa. Amagqwetha akhe acine ephumelela ukubhadala imali yesibambiso inkulungwane ezimbili zamadollar eMelika- US$2000.
UBennet uthathelwe ipassport, kwathiwa kumele ahlale emzini wakhe kodwa azibike emapholiseni eHarare kabili ngeviki. Kuthiwe engalokothi ukukhulumisana labafakazi ecaleni lakhe. Amagqwetha akhe athe ezama ukubhadala imali yesibambiso emthethwandaba eMutare kwabikwa ukuthi ihofisi yegqwetha elikhulu lesizwe u Attorney General ibisizama ukuphikisa isinqumo sokuthi uBennet aphume, kodwa lokhu kwehlula.
Ngesikhathi sisiya emoyeni besokulungiswa incwadi zokuthi u Bennet akhululwe. Amagqwetha akhe atshele iStudio 7 ukuthi uBennet ubuyela emithethwandaba mhlaka 18 kuyonale inyanga.
UBrenda moyo weStudio 7 ukhulume legqwetha elilwela ilungelo loluntu uMnumzana Kucaca Phulu uthi ukuyale lale kwabo mantshi lamagqwetha kahulumende ngodaba luka Bennet kutshengisa ukuthi bekungandelwa umthetho.
