Inhlanganiso zokholo kuleli zithi uhulumende omutsha kumele asebenzele ukumisa ukulwisana lokuhluluzwa kwabantu ngezombusazwe osokuqhamuka lapha lalaphaya kwezinye indawo zelizwe, abumbe uhlelo lwesizwe lokuxolelana aphinde ngesikhathi esifanayo akhulule ngokuphangisa abantu abalokhu besemajele ngamacala aphathelane lezombusazwe. Inthathelizindaba Yethu UThabang usethulela loludaba.
Ukufa ngengozi yemota kukankosikazi Susan Tsvangirai kuviki edluleyo kwaletha imicabango yokuthi lingozi okwasinda khona umnu. Tsvangirai ingabe yabangelwa yizitha zakhe eziku Zanu PF ngenjongo yokubulala utsvangirai. Kodwa ngensuku ezalandelayo kwavela ukuthi hatshi le bekuyingozi nje mahlayana engelasandla somuntu.UMongameli Mugabe laye ngomunye walabo abaduduza umMnu. Tsvangirai. Umbuzo osukhona ngowokuthi isehlakalo lesi silethe ndawonye ingwe lenja okungabangela ukuxolelana lokuthula ngesikhathi sombuso kahulumende womanyano na?
Ukuze sicubungule loludaba uChris Gande weStudio 7 uxoxe loMnu. Norman mabhena unobhala obona ngokuxolelalana lokumanyana kucele leMDC elikhokhelwa nguMnu. Morgan Tsvangirai endawonye lesiphathamandla senhlanganiso yezokholo, iChristian Alliance, umfundisi Useni Sibanda. USibanda uqala ngokuchasisa ngasebekutholile ezablweni zelizwe ngodaba lokuxolelana.
