Impilo ingani ithanda ukuba nzima kuqembu elitsha lenguqu ele Bantu Rovers esigabeni se Premier Soccer League. Inengi labalandeli bomdlalo kanobhutshuzwayo ababone umdlalo obuphakathi kweqembu le Bantu Rovers lele Highlanders ngeSonto liveze ukungakholwa ukuba iqembu le Bantu lizabumela ubunzima bokudlala esigabeni saphezulu ese PSL.
I Bantu ihlezi emsileni wengalane yemiklomelo ngemva kokudliwa emidlalweni yalo yomibili esidlalwe lonyaka njalo abalandeli bomdlalo bazwakale besola besithi leliqembu lilakho ukuyadlala ku Division one ngomnyaka ozayo uma lingathenganganga abadlali abangcono ngoba okwamanje liphethe abadlali elibathethe kumaqembu akhitshwa ku PSL labanye abehluleka kwamanye amaqembu.
I Bantu idliwe nge 1 ka nya yi Highlanders okuyimpumela etshiye i Bosso ihlezi phezu kwengalane yemiklomelo ndawonye le Dynamos yona enqobe i Black Rhinos nge 3 ka nya.
