UMongameli Robert Mugabe labasekeli bakhe uMnu. Joseph Msika lo Nkosikazi Joyce Mujuru bahlangene lo Mnu. Morgan Tsvangirai, inhloko kahulumende, laye elabakhe abasekeli kuhulumende womanyano, uNkosazana Thokozani Khuphe lo Mnu. Arthur Mutambara ngolweSine becubungula okuhluphayo elizweni.
Lo ngumhlangano wakuqala kulandela isivumelwano esenziwayo kubunjwa uhulumende womanyano ukuthi abayisithupha laba bazabumba ikomidi yokuthi bacubungule okuyabe kuhlupha elizweni ngendlela yokukulungisa.
Umphathintambo kahulumende obona ngokwenzakala ehofisini ka Mnu. Tsvangirai, uMnu. Gorden Moyo, utshele uSithandekile Mhlanga oweStudio 7 ukuthi ikomiti le izahlangana ngolweSihlanu njalo uzulu uzakwaziswa ngesikhathi esifaneleyo ukuthi kuyini okuyabe kuhlafunwa yikomidi le.
