Ingcwethi ezicubungula ezombusazwe zithi amabandla abumba uhulumende womanyano kumele azimisele ukulungisisa konke okuhluphayo kuhulumende lo. Lokhu kugoqela udaba lwabonobhala bengatsha zikahulumende, osibalukhulu bezabelo, udaba luka sibalukhulu webhanga elikhulu lelizwe umnumzana Gideon Gono legqwetha elikhulu lelizwe uMnumzana Johannes Tomana abangafunwa yi MDC.
Umongameli Robert Mugabe ukhanya ehudula inyawo njalo kudaba lokugcotshwa kukaMnumzana Roy Bennet njengomsekeli kamphathintambo wezokulima. Izolo ibandla le MDC elikhokhelwa yinhloko kahulumende uMnumzana Morgan Tsvangirai lithe uTsvangirai loMugabe kumele balungisise indaba ezilengayo kuhulumende womanyano kungakafiki uMvulo weviki ezayo. Ibandla le ZANU PF lithi lizimisele ukuthi uhulumende womanyano aphumelele.
Ukuhlaziya loludaba sixhume ingcwethi ezicubungula ezombusazwe uMnumzana Walter Nsununguli Mbongolwane loMnumzana Samukele Hadebe. UHadebe uthi uMongameli Mugabe ufuna ukutshengisa umhlaba wonke ukuthi nguye olamandla edlula aka Tsvangirai.