Icele leMDC elikhokhelwa nguMnu Morgan Tsvangirai lithi lilakho ukuphuma kuhulumende womanyano nxa abasekeli balo bengathi liphume.
Imbiko le ilandela imihlangano eqhutshwe licele leli koBulawayo eye National Execuve leNational Council ngempelasonto.
Emihlanganweni le icele leli linqume ukuthi liqhube uhlelo lokuxoxisana labasekeli balo elizweni jikelele phezu kokuthi luphume na kumbe lingaphumi kuhulumende lo.
Ibandla likaTsvangirai likhonona phezu kodaba lokungahlonitshwa kwesivumelwano seGlobal Political Agreement yiZanu PF lokungafezwa kwezinye inhlamvu ezikusivumelwano lesi.
I MDC ithi ingaqeda uhlelo lokukhulumisana lozulu ngemva kwenyanga izahlala phansi ihlaziye okuyabe kuphume kulolu hlelo.
UTsvangirai yena utshele abasekeli bebandla lakhe emhlanganweni oqhutshelwe eWhite City koBulawayo ngeSonto ukuthi kasoze abe esavumela uMongameli Mugabe ukwenza santando kuhulumende womanyano.
NgoMvulo uTsvangirai ubekhangelelwe ukwenza umhlangano loMongameli Mugabe loMnu Arthur Mutambara bekhulumisana ngokunengi okuphathelane lohulumende.
Emhlanganweni lo uTsvangirai ubekhangelelwe ukwazisa uMugabe ukuthi ibandla lkhe lipha iZanu PF isikhathi esithize esokuthi iqalise ukufeza isivumelwano seGPA.
Umsekeli wesikhulumeli seMDC kaTsvangirai, uNkosazana Thabitha Khumalo uthi ngempela balakho ukuphuma kuhulumende abasekeli babo bengathi bephume.
