Amalunga edale lephalamende kanye lawe senethi akhethwe kukhetho lukaMbimbitho abemele egcotshwe lamuhla ukuze eqale umsebenzi wawo ngoLwesine kuliviki phansi kwesi sekelo sombuso.
Inhlanganiso ecubungula ezemithetho i Veritas ithi amalunga la ebemele egcotshwe lamuhla, kodwa lokhu akusenzakalanga njalo akula lalizwi lokuthi lokhu kuzakwenzakala nini. Amalunga amadale womabili la agcotshwa ngumabhalane wephalamende, u Clerck of Parliament, hatshi umongameli welizwe njengokucabanga kwabanengi. Umabhalane lo nguMnu Austine Zvoma oweZanu PF okwamanje, obenguye obevele ephethe lesisikhundla kungakenziwa ukhetho.
Omela iNkayi edaleni lephalamende engowecele leMDC elikhokhelwa nguMnu Arthur Mutambara obekhangelele ukugcotshwa laye lamuhla, uMnu Abednico Bhebhe utshele lumsakazo ukuthi ukungasebenzi kwabameli bezigaba lokhu yinto engalunganga, esithi amalunga amadale womabili la kumele eqalise umsebenzi esebenzele uzulu.
Kusenjalo, sona isisekelo sombuso asikhulumi ngesijezizo sokuthi kungekela ukugcotshwa amalunga la ngesikhathi esitshiwo ngumtehteho kumele kuthathwe manyathelo bani. Kodwa isisekelo sombuso sithi umongameli Mugabe kamelanga adlulise inyanga ezintathu ebusa kungeladale lephalamende eligcotshwe okusemthethweni.
Ingcwethi kwezemithetho njalo eligqwetha uMnu Job Sibanda utshele uNtungamili Nkomo weStudio 7 ukuthi laloba ekunanzelela ukuthi inkulumo eziqhutshwa phakathi kweMDC leZanu PF yizo ezingaba zimise ukuqala umsebenzi kwamalunga ephalamende lawe senathi, vele eZimbabwe sokukompunzi idla emini njengoba kungaselamthetho olandelwayo.
