Inkulumo phakathi kwamacele womabili eMDC lebandla leZanu PF ziqhubekela phambili kusasa kweleSouth Africa.
Amaqula amabandla la, wona alubhekise eMzansi lamuhla, akhangelelwe ukuyabonisana ngokuthi ingxaki ezikhona zingaxazululwa njani kubunjwe uhulumende womanyano ngokuphangisa.
Icele leMDC elikhokhelwa nguMnu Morgan Tsvangirai lithi lizakwethula ugwalo kuMongameli Thabo Mbeki, ongumlamulankunzi kudaba lweZimbabwe, likhonona ngokuvulwa kwedale lePhalamende lohlelo lukaMongameli Mugabe lokubumba uhulumende kunsukwana ezilandelayo laloba inkulumo zingakaphethwa.
Uhulumende uthi unikezwe amandla ngumanyano weSadc ukuthi aqhubekele phambili ngaloluhlelo. Kodwa isiphathamandla seSadc uMnu Thanki Monthae uyakulandula lokhu.
Inkulumo zilokhu zilenga ngoba uMugabe lo Tsvangirai besehluleka ukuvumelana phezu kokwabelana amandla.
UMnu Arthur Mutambara owelinye lamacele eMDC uthi njengoMugabe, uvumelana lohlelo olukhona lokwabelana amandla. Kodwa uTsvangirai uthi kavumelani logwalo olukhona ngoba lumtshiya engelamandla awafunayo.
Ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi uzulu ukhangelele ukuthi inkulumo lezi zigqitshwe masiinyane kulungisiswe udaba lweZimbabwe.
