Ibandla leMDC selilandule imbiko yokuthi lingene kunkulumo eziqale ngoMvulo eSouth Africa ngenjongo yokwabelana izikhundla leZanu PF phansi kohulumende womanyano i Government of National Unity, (GNU).
Kulokwesabela ukuthi ibandla leli lingaba likulandula lokhu lizama nje ukuvala uzulu amahlo, kodwa ingcwethi zithi, okulempondo akufihleki emgodleni, impondo lezi zizashesha zibhoboze lumgodla zichayeke egcekeni nje.
Imbiko esiyamukelayo ngethi, amabandla la alakho ukuguqula isisekelo sombuso asungule isikhundla sikaNhlokonkulu (Prime Minister) wohulumende weZimbabwe esizanikezwa uMnu Morgan Tsvangirai, uMnu Arthur Mutambara anikezwe esokuba ngumsekeli kaMongameli welizwe Kuthi uMnu Robert Mugabe yena aqhubeke enguMongameli.
Ukuhlaziya udaba lwenkulumo lezi, untungamili Nkomo weStudio 7 uxhumanise isiphathamandla seMDC uMnu Sam Sipepa Nkomo lengcwethi ecubungula ezombusazwe uMnu George Mkhwanazi.
UMnu Mkhwanazi usungule ingxoxo yethu ngokuxwayisa ukuthi amabandla akulezi nkulumo kumele ekhulumisane ngokuqotho efake izifiso zikazulu weZimbabwe phambili. Wengezelele wathi okukhangelelwe nguzulu nguhulumende wesikhatshana hatshi lowomanyano okuthiwa yiwo ofuna ukubunjwa yiZanu PF leMDC, okungumbono ogcizelelwa nguMnu Nkomo.
