Abakhokheli bamacele womabili eMDC, uMnu Morgan Tsvangirai loMnu Arthur Mutambara kanye loMongameli Mugabe bazahlangana lequla leSadc troika lamuhla ntambama eSouth Africa bechasisa ukuthi kuyini okuhluphayo kunkulumo okwenza behluleke ukuvumelana.
Bobathathu baye eSouth Africa lamuhla ngemva kokumenywa yiSadc ukuthi bazezikhulumela bazise iTroika ngokuhluphayo.
Amalunga eSadc Troika, uMongameli weTanzania uMnu Jakaya Kikwete, uMongameli weAngola uMnu Jose Eduardo dos Santos kanye loNhlokonkulu kahulumende weSwaziland uMnu Themba Dlamini yibo abazangena lumhlangano loMugabe kanye lenkokheli yeMDC.
Iqula leTroika libikwa lizazama ukukhulumisana labathathu laba lalo liphe imibono yalo ekuthini bengenzani ukuze bevumelane. Bobathathu bengehluleka ukuthatha izeluleko zeTroika, udaba lwabo luzahlaziywa ngumhlangano weSadc kusasa.
Imbiko esiyamukeleyo ngethi abaphathintambo ababona ngezangaphandle kwelizwe emazweni eSadc, basola uTsvangirai ngokungafuni ukuvuma ukwabelana amandla loMugabe efuna ukuba nguye umkhokheli kahulumende olamandla jikelele.
Ngakwelinye icele inhlanganiso elwela amalungelo eziphepheli eyeZimbabwe Exiles Forum (ZEF) ikhweze udaba lwayo kuSadc Tribunal lamuhla isithi ifuna uMugabe engavunyelwa ukungena emhlanganweni weSadc emele iZimbabwe ngoba engakhethwanga nguzulu.
Ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi iqula leSadc Troika lingehluleka ukulungisisa udaba lolu lamuhla, kusasa akulalutho umhlangano weSadc ngokwawo ongakwenza.
Kunjalo nje, abantu abanengi bathi kabathembi ukuthi inkulumo lezi zizaphutsha kuhle laloba sokungeniswe inkokheli yeSadc yonke ngoba uMongameli Mugabe loTsvangirai beqinisa amakhanda bedonselana phezu kodaba lokwabelana amandla.
uSithandekile Mhlanga weStudio 7 uxoxe legqwetha elilwela ilungelo loluntu uNkosazana Anah Moyo endawonye loAlderman Charles Mpofu wakoBulawayo behlaziya loludaba.
