Inkulumo zokuxazula inkinga kwezombusazwe eZimbabwe phakathi kweZanu PF lamacele womabili eMDC ziqala lamhlanje ePretoria, South Africa.
Imbiko kaMongameli Mugabe eyokuthi uzabumba uhulumende kunsukwana ezimbalwa ezilandelayo kungelani lokubakhona kumbe ukungabikhona kweMDC, itshiye abeMDC lozulu bezibuza ukuthi kambe lokhu uMugabe azama ukukwenza uzakwenelisa na?
UMugabe wazise ngolweSibili ukuthi njengoba ibandla leMDC elikhokhelwa nguMnu Morgan Tsvangirai likhanya ligafuni ukusayina ugwalo lokwabelana amandla leZanu PF kanye leMDC ekhokhelwa nguMnu Arthur Mutambara, ukubona ukufanele ukuthi abumbe uhulumende lalabo abafuna ukusebenzelana laye.
Abazi ngokwenzakalayo kuloludaba bathi uMugabe ubevele efuna ukwazisa amalunga eCabinet ekuvulweni kwePhalamende ngolwesibili, kodwa wancengwa yiziphathamandla zebandla lakhe ezathi aqale ame kubonakale ukuthi inkulumo zihamba njani.
Sibuze ingcwethi ezicubungula ezombusazwe uDokotela Themba Dlodlo ofundisa eUniversity yeNUST koBulawayo lomqondisi wenhlanganiso yeCrisi in Zimbabwe Coalition ukuthi kambe uMugabe engaqhubekela phambili ebumbe uhulumende ongela MDC phakathi, kungaba linyathelo elillokuhlakanipha yini.
UDlodlo uthi, cha yibuwula bodwa ayabe ebenzile.
