Inkulumo phakathi kwebandla leZanu PF lamacele womabili eMDC eziqhutshelwa kwele South Africa bezembathiswe liyezi elimnyama lamuhla kungakhanyi kuhle ukuthi ziqhutshwa njani.
Imibiko ethulwe yinhlanganiso yezindaba eyeAssociated Press (AP) ithi inkulumo lezi zingaba sezitshabalele kulandela ukungavumelani phakathi kweziphathamandla zeMDC lezeZanu PF phezu kokuthi ngubani okumele abe yinhloko kahulumende. Kodwa eminye njalo imibiko ngethi inkulumo lezi zithethe nje ikhefu kazitshabalalanga.
Imizamo yeStudio 7 yokudingisisa iqiniso yehlule. Kodwa i AP ithi iziphathamandla zeZanu PF zilakho ukubuyela eHarare kusasa ukuyakhulumisana loMongameli Mugabe zimazise ukuthi kungaphi ezehluleke ukuvumelana khona leziphathamandla zeMDC.
Imibiko le iza lapho uMugabe ngokwakhe ebikwa seqalisile ukukhulumisana lomkhokheli welinye lamacele eMDC uMnu Morgan Tsvangirai. Yena ngokwakhe uTsvangirai uye kwele South Africa lamuhla ukuyakhulumisana lequla elimela ibandla lakhe kunkulumo ezilawulwa nguMongameli Thabo Mbeki lezi.
Isikhulumi sikaTsvangirai uMnu George Sibotshiwe uveze ukuthi uTsvangirai ufike eMzansi Africa emini lamuhla, kodwa walile ukuveza injongo yohambo lwakhe. Abazi ngcono batshele iStudio 7 ukuthi uTsvangirai ulande ukuyakhulumisana lequla lakhe kunkulumo lezi limazise ukuthi yiziphi indaba esezihluziwe lokuthi kuyini asebekuvumelene selokhu ziqalileyo ngoLwesine.
Ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi akumangalisi ukuthi uTsvangirai loMugabe bangabe sebekhuluma eceleni ngoba vele bemele bebhekane bobabili bekhulumisane.
