amalinks wokungena

Breaking News

Abadabuka eGwanda South leBeitbridge abaseSouth Africa Basungula Uhlelo Lwemfundo


Uzulu odabuka emhlubulweni weGwanda South le Beitbridge osebenzelaa kwele South Africa usesungule uhlelo lokuvuselela ezemfundo lamasiko kulezo ndawo ngemva kokunanzelela ukuthi inengi labantwana abaphuma khona kabasayi esikolo kukanti lamasiko asetshabalala.

IGwanda le Beitbridge ngezinye zendawo ezaziwa ngendlala enkulu ngenxa yokusilela kwezulu. Izakhamizi zakulezi indawo ezisebenzela kwele South Africa zithi lezi ndawo sezibuye zabhekana lolunye uhlupho lokutshabalala kwezamasiko kanye lolwabantwana abehluleka ukuya esikolo ngenxa yezizatho ezitshiyeneyo.

Umnumnzana Khanyisile Galaja odabuka eGwanda uthi inani labantwana abangasayi esikolo kulezi indawo zombili yilo eselenze inhlanganiso yabo ye Veso yasungula i Paul Matshaka Foundation, okuyisikhwama semali esizaxhasa abantwana bonke abangasafundiyo. Uthi bazaqala ngokudinga abantwana abakhaliphileyo esikolo kodwa abangasafundiyo ngenxa yokusilela kwemeli.

Uthi ulethemba lokuthi uhlelo lwabo lolu ngeke lubhekane lobunzima njengoba ngaphambilini sebeke benza inhlelo ezinengi zokuxasa izikolo kulezi indawo.
Umnumnzana Thabson Mabhanga Ncube odabuka emangweni we Bethel esigabeni seSezhube eGwanda, uthi bathole ukuthi zinengi izizatho ezenza abantwana abanengi bangayi esikolo kulezi indawo.

Kukhona abafelwa ngabazali abangasela muntu ongababhadalela imali yesikolo. Abanye balabo abazali kodwa indlala ibhahile okokuthi imali yendleko zesikolo kayikho. Bakhona njalo athi bavelenje bazihlalele ngoba bengaboni ukuqakatheka kwemfundo. Uthi lobanje uhlelo lwabo lolu ludinga uxhaso olukhulu, bakhona asebethembisile kantike lamalunga enhlanganiso yabo ye Veso azimisele ukufaka imali esikhwameni se Paul Matshaka Foundation.

Umnumnzana Ncube uthi okunye okubahluphayo yikungaqakathekiswa kwezifundo ze Science le Maths kulezi indawo. Uthike bahlela ukubonana labezemfundo, ukuze babonisane ukuthi xhaso bani olufunakalayo lokuthi izikolo zakule imango zibe lezindlu lemitshina yokufundisa ezeScience.

Izakhamiso seGwanda leBeitbridge lezi zithi, okunye okuzikhathaza kakhulu yikutshabalala kwamasiko amaVenda, amaSuthu kanye lawama Jaunda.
Isizalwane seBeitbridge umnumnzana Jonathan Mbedzi uthi umkhankaso wabo wezamasiko uzaququzela ukuthi izakhamizi zakulezi indawo zizigqanje ngendimi lamasiko abo hatshi ukuqakathekisa indimi zeminye imihlobo.
Yenake ukhombisa akutshoyo ngokukhetha ukukhuluma labantu bakubo ngolimi lwabo.

Uthi ulethemba lokuthi abathole uxhaso phansi kwenhlelo zabo lezi, yibo asebezasebenza gadalala bekhuthaza abasakhulayo ngokuqakatheka kwemfundo lamasiko. Uthi bahlela ukuqhuba imihlangano lemibuthano yezamasiko ezigabeni ezisezgwanda leBeitbridge ukuze lokhu asebekuqalile kungapheleli ekukhulumeni.
XS
SM
MD
LG