amalinks wokungena

Breaking News

Abadlali Kabaholiswe BekuLockdown: FUZ


U-Thomas Sweswe yisiphathamandla senhlanganiso yeFootballers Union of Zimbabwe

Inhlanganiso ye Footballers Union of Zimbabwe ikhuthaza amaqembu ukuba aqhubekele phambili ebhadala abadlali ngesikhathi ezemidlalo zimisiwe.

Isiphathamandla senhlanganiso ye Footballers Union of Zimbabwe uThomas Sweswe uthi abakatholi izikhalazo ezivela kubadlali bekhonona ngokuthi kabakaholi njalo bayakuthakazelela lokho ngoba abadlali balobelana izivumelwano zomsebenzi lamaqembu.

“Ngithanda ukubonga amaqembu ngoba ayalandela izivumelwano abazilobelana labadlali ngitsho ngoba singakatholi imibiko ethi bakhona abadlali abangakabhadalwa imali zabo.

Sikhuluma nje abadlali balandela inhlelo abaziphiwa ngamaqembu abo ukuba bazilandele ngesikhathi besezindlini okutsho ukuba basemsebenzini, ngalokho ke kumele baqhubekele phambili behola,” kutsho uSweswe.

USweswe ngunobhala jikelele wenhlanganiso ye Footballers Union of Zimbabwe yona emela amalungelo abadlali bomdlalo wenguqu kwele Zimbabwe.

Imidlalo yenguqu kusigaba se Premier Soccer League bekumele iqale ngenyanga kaMbimbitho kodwa idluliselwe phambili ngemva kokuqhamuka komkhuhlane we Covid 19 kodwa sekukhangelelwe ukuba limidlalo izaze iqale ngenyanga kaNcwabakazi.

Emazweni aphetsheya kanye laselizweni lase South Africa amanye amaqembu avumelane labadlali labaqeqetshi ukuba iholo ligavunwe njengoba lamankampani aphathisa amaqembu ngosekelo lwemali lawo ebhekane lenkinga yokungenzi imali ngenxa yomkhuhlane we Covid 19.

Kulemibiko ethi iqembu le Highlanders lalo liphakathi kwenkulumo lomqeqetshi walo uMark Harrison licela ukuba lingamuphi lonke iholo lakhe ngoba labo abaphathisa iqembu ngokumholisa labo bebhekane lenkinga ezidalwe yikumemetheka komkhuhlane we Covid 19.

Iqembu le Highlanders ngelinye lamaqembu agoqela ele CAPS United kanye lele Black Rhinos abesekelwa ngemali yinkampani ye Net One yona ebikwa isithe ayisenelisi ukuqhubekela phambili ifaka imali kulawamaqembu.

Emazweni isiqalile imizamo eyokuqhubekela phambili ngomdlalo wenguqu njalo kwele Germany kulenhlelo ezokuba imidlalo iqhubekele phambili ngempelaviki elandelayo.

Facebook Forum

XS
SM
MD
LG