amalinks wokungena

Breaking News

Izizalwane zeZimbabwe Ezihlala Kwele South Africa Zibhalisa Kugwalo Lokuvota


Annahstacia Ndlovu

Izakhamizi zezansi yeMandebeleleni ezihlala kwele South Africa sezithethe ithuba lokungezelelwa kwesikhathi sokubhalisela ukuvota ngaphansi kohlelo lweBiometric Voter Registration (BVR) ukuba balungisise incwadi zabo zokuzalwa lezithupha zibesezibhalisa amagama kugwalo lokuvota.

Izakhamizi ezenza lokhu ezihlala kwele South Africa lele Botswana ngezise Kheme Village kuWard 6 eMagwe lezinye indawo ezethekelelwe yintathelizindaba yeVOA Studio 7.

Omunye wabo nguMnu. Thulani Moyo, osebenzela kwele South Africa, othi uze ekhaya ukuba enelise ukulungisa incwadi zakhe zokuzalwa lesithupha ukuze ayebhalisa ukuvota.

Isakhamuzi sakoKheme, uMnu. Alec Ndebele, uthe incwadi zokubhalisa ukuvota ulazo kodwa kaselathemba lempumela yokhetho ngoba abezombusazwe abagcwalisi izethembiso zabo.

Uthe amabandla ezombusazwe asemanengi kakhulu kasazi ukuthi loma angaze abhalise uyavotela bani njalo lombuso webutho awubajabulisi.

Umsekeli womqoqi wenhlelo zebandla leZAPU, uMnu. Ndodana Moyo, ukhuthaza abantu ukuba bayebhalisa baphinde baze ukuzovota.

Evumelana loMoyo, umgcinisihlalo webandla leZAPU eMatabeleland South, uMnu. Mathew Sibanda, ukhuthaze abesifazana athi kabasukumeli phezulu ukuyabhalisa baphinde baqunge isibindi bangene labo kwezombuso welizwe ezikhundleni ezikhona ukuze kubelentuthuko ezigabeni.

Ikhomishini ebona ngezokhetho eye Zimbabwe Electoral Commission yengezelele isikhathi sokubhalisa ukuvota ngaphansi kohlelo lweBVR osekunikeze ithuba kuzizalwane zeZimbabwe ezisebenzela phandle kwelizwe ukuba zenelise ukubhalisa ukuvota kunye labalabazali abasuka kwamanye amazwe bezalelwe kuleli kuhlanganisa labathola incwadi zokuzalwa lezithupha ngemva kokuba ababhalisa ukuvota sebedlule eziqintini zabo.

Kusenjalo, inani labantu eMaNdebeleni ababhalise ukuvota liphansi uma liqathaniswa lakwezinye izigaba zelizwe okubangele ukuba uhlelo lweBVR luqhubekele phambili ezweni. Izizalwane zeZimbabwe ezisebenzela kwamanye amazwe kazisoze zenelisa ukuvotela lapho ezisebenzela khona ngaphandle kokuba idale lephalamende lize liguqule imithetho yezokhetho ivumele ukubhalisa ukuvota lokuvota ngaphandle kwelizwe.

Facebook Forum

XS
SM
MD
LG