Abameli beZanu PF lamacele womabili eMDC kunkulumo zokuxazulula okuhluphayo kuhulumende womanyano sebenikeze ugwalo lwempumela yenkulumo zabo kubakhokheli bamabandla abo.
Abakhulumisanayo laba baqoqe ugwalo lolu ngoLwesihlanu ngemva kokuba behlulekile ukugqiba inkulumo zabo ngesikhathi ebesihlelwe ngumlamulankunzi kudaba lweZimbabwe, uMongameli Jacob Zuma wakweleSouth Africa.
Iqula likaZuma lona lizathola ugwalo lolu ngoLwesithathu, kufakaze uNkosazana Lindiwe Zulu, olilunga laleli qula. Wengeze wathi bazalufunda bahlanganise amakhanda loZuma phezu kwezinto ezilokhu zihlupha phakathi kweZanu PF leMDC andubana babuyele njalo eZimbabwe kuliviki.
Abamela amabandla abo kulezi nkulumo bathi sebeyehlulekile ukulungisisa udaba lukaMnu Gideon Gono ongusibalukhulu webhanga elikhulu lelizwe loMnu Johannes Tomana umtshutshisi omkhulu kahulumende. Ngalokhu, bathi uMongameli Mugabe, uMnu Arthur Mutambara loMorgan Tsvangirai sokumele bazame bona ukulungisa loludaba.
Ukuhlaziya udaba lolu uNtungamil Nkomo weStudio 7 uxhume uMnu Qhubani Moyo othi kuyadanisa ukuthi amabandla akuhulumende alokhu ehluphana ngoGono loTomana.
