Abakhokheli bamabandla akuhulumende womanyano sebeze banikeza uMongameli Jacob Zuma ugwalo olumumethe isimo senkulumo phakathi kwamabandla abo kulandela umhlangano abawenze ngoLwesibili eHarare.
UMongameli Robert Mugabe, uMnu Morgan Tsvangirai loMnu Arthur Mutambara banikeze uZuma ugwalo lolu ngoLwesine ekufikeni kwabo eSouth Africa belanda ukusungulwa kwemidlalo yeFifa Soccer World Cup ngoLwesihlanu.
Umcebisi kaZuma, uNkosazana Lindiwe Zulu utshele iStudio 7 ukuthi uZuma uzaluhlaziya ugwalo lolu andubana athathe amanyathelo. Abazi ngokwenzakalayo bathi kulokhu kungelakuvumelana phakathi kweMDC leZanu PF entweni ezinengi.
Bekulembiko ngoLwesine eyokuthi uMongameli Zuma engahlangana labathathu laba eJohannesburg, kodwa lokhu kubikwa kungasenzakalanga.
Ukuhlaziya udaba lwenkulumo lezi esezilesikhathi eside ziqhutshwa uNtungamili Nkomo weStudio 7 uxhume ingcwethi ecubungula ezombusazwe uMnu Brilliant Mhlanga yena othi amabandla akuhulumende adlala amadlwane.
