amalinks wokungena

Breaking News

Abalandeli beHighlanders bakhonona Ngokuphuza Kwesisekelo Sombuso Weqembu Kulandelwa Iziqondiso ze FIFA


Iqembu leHighlanders FC

Abalandeli beqembu le Highlanders bakhonona ngokuphuza kohlelo olokulungisisa isisekelo sombuso saleliqembu kulandelwa iziqondiso zenhlanganiso ye FIFA.

Iqembu le Highlanders ngeSonto libe lomhlangano walo oqhutshwa minyaka yonke lapho abalandeli baleliqembu abaveze ukungasuthiseki kwabo ngokuphuza ukuthutsha kohlelo lokulungisisa isisekelo seqembu.

Loluhlelo lusungulwe ekuqaleni kwanyakenye njalo kwakukhangelelwe ukuba luphele ngomnyaka ofanayo kodwa seluze lweqela lalonyaka.

Umsekeli weqembu le Bosso uNjabulo Bango uveze ukudana okukhulu ngokuba sekuze kwafika ukhetho lokudinga inkokheli entsha kuqembu leli isisekelo sombuso silokhu singakalungisiswa.

Kutsho uBango: “Okusuka kusikhathaze njalo kusidanise yikuba siyabuya lapha sihlale sithembise ukuba ngoNtullikazi sizakwenza lokhu lalokhu kuze kuphele umnyaka kuqale omunye.

Sabuya lapha ngoNtulikazi sathenjiswa ukuba kuzakuba lomhlangano kungakapheli umnyaka kulungiswe udaba lolu ukwenzela ukuba kuthi kufika ukhetho seluphelile kodwa konke lokhu akufezekanga.”

Okhokhela iqula eliqhuba umsebenzi wokulungisisa isisekelo sombuso weqembu le Highlanders uElkanah Dube uthi basuka bahlangana lezibambeko ababe ngazikhangelelanga ekuqhubeni kwabo lumsebenzi.

“Kwesinye isikhathi nxa ungumtshayeli webhasi uyahlela ukuba uzasuka esititshini uthathe amahola athile ukuyafika eHarare kodwa endleleni lapha ulakho ukupontshelwa ngamavili kumbe udinge uswele amafutha okuhambisa ucine usumile yikho ke lathi sasingakucabanganga ukuba singadibana lembambeko,” kutsho uDube.

Abalandeli beqembu bahle baphiwa ugwalo oluqukethe lokho okwahlanganiswa liqula leli elikhokhelwa nguDube ukuba bekuhlolisise njalo bethule imibono phezu kwalo.

Umsekeli weqembu uMgcini Mafu ukhuthaze ukuba abalandeli bengajahi ukuba loluhlelo lufike emaphethelweni ngoba esithi luqakatheke kakhulu yikho akumelanga luphazamiswe.

“Ngiyabonga ukuthi sesize saba lakho esandleni. Isisekelo sombuso akusiwo mandlwane. Nxa sikhuluma iqiniso lapha siyakha into yabantwana babantwana yikho ke asingaphenduki lapha sesizisola ngenxa yokujaha, kumele sibale kuhle into le,” kutsho uMafu.

Uhlelo lokuguqula isisekelo sombuso seqembu le Highlanders luqalwe ngoba leliqembu lifuna ukulandela izinqumo zenhlanganiso ebona ngokuqhutshwa komdlalo wenguqu elizweni jikelele eye FIFA olwe FIFA Club Licensing.

Loluhlelo luzadala ukuba amalunga eboard alahlekelwe yizikhundla ngoba kusakhiwo esitsha esobukhokheli akula ndingeko eyokuba le board okuyinto edale inkulumo eyokuba mhlawumbe abadala abaku board ye Highlanders yibo abadonsa inyawo phezu kwaloludaba ngoba bezalahlekelwa yizikhundla.

Amalunga eqembu avumelane ukuba kuthi kuphela inyanga kaMabasa sebehambise imibono yabo phezu kogwalo abaluphiwe namhla kube sekuqhutshwa umhlangano wokupasisa izinqumo eziyabe zithethwe ngabalandeli ngenyanga kaNtulikazi.

please wait

No media source currently available

0:00 0:03:16 0:00

Facebook Forum

XS
SM
MD
LG