Umsekeli kamongameli welizwe uMnu. Constantine Chiwenga, uthi uhulumende uyathokoza okwamagama ngesivuno sabalimi salonyaka esithi bazaqhubekela phambili besenza konke okusemandleni abo ukuthuthukisa umsebenzi wokulima elizweni.
Umsekeli kamongameli uveze injabulo yakhe evula okusemthethweni umhlangano wabosomabhizimusi, owenzelwe embukisweni omkhulu wezokulima elizweni oweHarare Agricultural Show Ngolwesithathu.
UChiwenga uthi bakhangelele ukuthi ngokumelela okwenze inhlelo zabo zokulima ebe ziphathisa nguhulumende ezifana lolukamongameli lokuphathisa abalimi ngenhlanyelo, imvundiso lokunye okokulimisa, olwePresidential Input Scheme, lonyaka kuzakwengeza idlabuzane labalimi ukuthi bathuthukise umsebenzi wabo okuzadala ukuthi isivuno somnyaka ozayo sikhuphuke ukwedlula esalonyaka.
UChiwenga uthembise ukuba uhulumende wakhe uzathatha amanyathelo aqinileyo okubona ukuthi abalimi bayaphathiswa ngazo zonke indlela ukuze kwehliswe inhlupho abahlangana lazo emsebenzini lokuthi bahlawulwe intengo engcono lapho sebethengisa isivuno sabo bathole inzuzo yokunakekela imuli kanye lokuyathenga okokulimisa komnyaka ozayo.
Kodwa waxwayisa abalimi ukuthi kumele baqhakathekise umsebenzi wabo basebenze njengabantu abaqhatshiweyo hatshi ukutshona besiyazingela omvundla kumbe ukudinga imbeba emaphulazini abo, njengalokho okwenziwa ngabanye.
UChiwenga uthembise abalimi ukuthi iziqondiso zokumelana leCovid 19 eze Lockdown zizayekethiswa ukuze bengabhekani lenhlupho lapho behambisa isivuno sabo besiyathengisa emikhambo leziphaleni zelizwe.
Waxwayisa osomabhizimusi abathenga lokuthengisa imali emkhambo ongekho emthethweni, esithi bazajeziswa kanzima bengabanjwa.
Ucine ngokukhuthaza osomabhizimusi, abalimi, abembayo labanye ukuthi basebenze ndawonye ukuzithuthukisa ngokwabo okwezinga laphezulu okuzakhokhelela ekuthini bathuthukise umnotho welizwe.