amalinks wokungena

Breaking News

Abancitshwa Ubuphepheli kweleBhilithani Baphindiselwa Ekhaya


Ugatsha olubona ngendaba zasekhaya kweleBhilithani olweHome Office soluqhelisa uhlelo lwalo lokuphindisela ekhaya izizalwane zeZimbabwe ezancitshwa ubuphepheli kulelolizwe.

Eminyakeni edluleyo zinengi izizalwane zeZimbabwe ezangena kweleBhilthane zacela ubuphepheli zisithi zibalekela uhulumende kaMnu Robert Mugabe.

Abanye baphiwa izincwadi zokuhlala kodwa abanye bancitshwa.

UNkosazana Sizalobuhle Moyo ngomunye wabancitshwayo njalo ubotshwe wabuyiselwe eZimbabwe kunyanga ezithize ezidlulileyo. Okwamanje, useSouth Africa.

“Mina ngabuya eUK ngo2005 nga-applayela ukuphephela bangincitsha amaphepha,” kutsho uMaMoyo.

“Ngenza wonke ama-appeals kodwa bayala. Ekuqaleni kwalonyaka bangithatha ebusuku bangidiphotha bangibisela ekhaya ngingelalutho and angisela zihlobo yikho nje sengiseSouth Africa ngidinga umsebenzi.”

Omunye wezizalwane zeZimbabwe ezivalelweyo ezilinde ukubuyiselwa ekhaya nguMnu Farai Phiri yena othi udabukile enhliziyweni.

“Ngibuhlungu, sengile 4 months ngivalelwe. Ngabuya kulelilizwe ngo2007, ngafunda ngile degree kodwa bangincitsha amaphepha. Bathi bafuna ukungi diphotha,” kulandise uMnu Phiri evalelwe.

Abanye ngabafika eBhilithane kudaladala kodwa kuze kube namuhla abakatholi incwadi zokuhlala ngokusemthethweni. Omunye wabo nguMnu Zibonele Ndlovu oseleminyaka engamatshumi amabili.

“Mina ngahamba lapha esikolo ngafunda ngeyenza inursing, imental health nursing, ngahlala 20 years but angikaphiwa istatus, ngabuya ngile 19 years khathesi sengile 41 years,” kutsho uMnu Ndlovu ngenhliziyo ebuhlungu.

Abanengi abafohla eZimbabwe bebalekela udlakela lwezombusazwe oluvela kuZanu PF bathi akulalutho osoluguqukile ekhaya nanku lelibandla lilokhu liyilo elibusayo.

Bathi ukususwa kukaMugabe akutsho lutho; okuqakathekileyo yikuthi abantu ababehlukumeza abamabandla aphikisayo besebenzelana laye uMugabe abagoqela uMongameli Emmerson balokhu bekhona.

Ngakho, bathi ukubabuyisela eZimbabwe yikubafaka engozini enkulu.

Kodwa isikhulumeli sikaHulumende weleBhilithane sitshele iStudio 7 ukuthi kababuyeli emuva ngaloludaba.

Kusabusa uMugabe, ukubuyiselwa emuva kwezizalwane zeZimbabwe yiBhilithane bekungavamanga, kodwa sokusiba yinsakavukela umchilo wesidwaba kulezinsuku.

Abanye bathi isizatho yikuthi sokubusa uMnangagwa yena okhanya elobudlelwano obuhle leleBhilithani.

please wait

No media source currently available

0:00 0:02:52 0:00

Facebook Forum

XS
SM
MD
LG