amalinks wokungena

Abongi bakhuthaza uhulumende ukuba alungisise izikhalazo zabo kanye lezabodokotela asebelesikhathi bakhalala umsebenzi.

Ngasikhathi sinye, odokotela asebelamaviki amabili bakhalala umsebenzi, bathi kabaphindeli emsebenzini izikhalazo zabo zingakalungisiswa.

Isicelo sabongi labongikazi siza ngesikhathi izigaba ezinengi zezibhedlela ezinkulu zikahulumende, ezibalisa eseChitungwiza le Harare Hospitals, ziqhubeka zivalwa ngoba bengekho abangasiza izigulane.

Abongi laba, abaqale ukukhalala umsebenzi ngoLwesibili, bathi balezikhalazo ezinengi esezileminyaka embili zilokhe zingakalungisiswa.

Unobhala jikelele wenhlanganiso yabongi, eye Zimbabwe Nurses’ Association, uMnu. Enoch Dongo, utshele intathelizindaba ukuba okunye kwabakhonona ngakho yikungabhadalwa kwamabhonasi anyakenye kanye lokusilela kwempahla lemitshina yokusebenzisa.

Ngakuhlangothi lwamadokotela, abenhlanganiso ebamelayo eye Zimbabwe Hospital Doctors’ Association, bathi odokotela batshaya phansi besithi kabasoke baphindela emsebenzini kungakalungiswa abahlezi bekhala ngakho.

Umkhokheli wale inhlanganiso, uDr. Edgar Munatsi, uthe kusobala ukuba uhulumende akazinikelanga ukulungisisa inhlupho zabo.

Lokhu kugcizelelwa ngummeli wesigaba seBinga North edale lephalamende, uMnu. Prince Dubeko Sibanda, otshengise ukukhathazeka ngokwenza kukahulumende.

Sekungamaviki amabili odokotela laba beqala ukukhalala umsebenzi kungekho okubonakalayo okwenziwa nguhulumende ukulungisisa inkinga le.

Kungalesi sizatho abenhlanganiso ye Zimbabwe Human Rights Commission bekhuthaza ukuba kuxoxiswane ngesiphangiphangi ukwenzela ukulondoloza impilakahle kazulu elizweni.

Ngakolunye udaba, umphathintambo wezokuthwalwa kwempahla, uDr. Jorum Gumbo, umangalise intathelizindaba ngoLwesithathu aziqholozele emhlanganweni awubize emahofisini akhe, wala ukuphendula imbuzo ebuzwe ngolimi lweSiNdebele, ukuba achasise phezu kwesimo semigwaqo elizweni ngalesi sikhathi kusina izilu elikhulu endaweni ezinengi zelizwe.

UGumbo ukubeke sobala ukuba akafunanga ukuphendula limbuzo lanxa ngaphambilini ubephendula imbuzo ngendimi ezibalisa isilungu lolwesiShona, wathi kanelisi ukukhuluma isiNdebele, esaziwa ukuthi uyasanelisa.

Facebook Forum

XS
SM
MD
LG