amalinks wokungena

Breaking News

Sithembiso Nyoni: Abaninibhizimusi Besifazana Kumele Bazithuthukise Bakhule


Sithembiso Nyoni
Umphathintambo wezamabhizimisi athuthukayo, uNkosikazi Sithembiso Nyoni uthi lanxa amabhizimisi amancane elakho ukuphilisa imuli, sesifikile isikhathi sokuthi amabhizimisi la kanye labesifazana bawasebenzise ukungena kumabhizimisi amakhulu njalo bathole amathuba okukhokela ezigabeni zonke zempilo.

UNkosikazi Nyoni, obekhuluma emkhosini wokwethula inhlanganiso ye Proweb koBulawayo kanye loluhlu lwayo lwamabizo abesifazana abalonhlonzi elizweni esebulenjini i-E-Directory, uthi ugatsha lwakhe solwasebenza gadalala ukuthi abesifazana basungule amabhizimisi abasusa emikulwini ebasa labo endaweni eziphakemeyo kunotho yelizwe.

Uthi kuqakathekile ukuthi abesifazana babambane baphane isibindi ngoba izandla ziyagezana njalo umumo awuvumeli owesifazana ozimele yedwa ukuthi aphumelele kwezamabhizimisi.

Wengeze esithi i-Proweb njengenhlanganiso edinga ukuthuthukisa abesifazana yamukelekile koBulawayo kodwa uthemba ayizukufana lezinye inhlanganiso eziza zivela eHarare zithembise izulu lomhlaba bese zitshiya zibambise abantu ilitshe osokwenze osomabhizimisi bakoBulawayo bahambele nyovane.

Ekhuluma kulumkhosi, umongameli walinhlanganiso, u Nkosikazi Sibusisiwe Bango, uthi kuvamile ukuthi kuthiwe abesifazana badonselana emuva kodwa sokwadlula lokhu ngoba omama bakulezi insuku basebenza ndawonye bekhulisana.

Uthi ugwalo lwe E-Directory olwethulwe lamhla lulamabizo abesifazana abalonhlonzi okutsho ukuthi inhlanganiso ezitshiyeneyo nxa zidinga abesifazana bokusebenzelana labo kumbe bokubangenisa kuma – board amankampani alakho ukudinga nje lolugwalo esethola lowo muntu amdingayo.

Uthi yena ukuphumelela kwakhe kungexa yokuphakanyiswa ngabanye abesifazana kanye lamathuba abamnika wona okuveza ukuqakatheka kokusebenzela ndawonye.

Ukhansila ka Ward 8, uNkosikazi Shilla Musonda, ongene lumhlangano, uthi kuvamile ukuthi abesifazana besabe umnyama ongelampisi lapho kukhulunywa ngezamabhizimisi kanye lezombusazwe okwenza kuqakatheke ukuthi bathole obaxhasayo.

Uqhubeke ethi lanxa nje lonyaka ebengukhansila ubelokhu esasilela ukuthi abe lesibindi sokungena kwezamabhizimisi kodwa ngemva kokuhlangana labanye abesifazana abalakho ukumsekela usezaqala ukusebenza.

Umhlangano lo ungenwe ngabesifazana bakumabhizimisi atshiyeneyo koBulawayo kanye labakwezombusazwe. Lanxa inengi labesifazana lilamabhizimisi amancane, inhlolisiso enziwe ngabe World Bank nyakenye iveze ukuthi abesifazana abakumabhizimisi la baqhatsha abantu abayizigidi ezintathu elizweni. Umkhosi lo ubusekelwe yinhlanganiso ye Women Unlimited kanye le Embassy yeMelika.
XS
SM
MD
LG