amalinks wokungena

Ababizwa Ngokuthi NgaMashurugwi Bakhahlameza Uzulu eNyathi


Intathelizindaba zixoxa lomunye olimeleyo eNyathi.

Izakhamizi zeInyathi esiqintini seBubi esabelweni seMatabeleland North zihlalele evalweni kulandela ukuqhamuka kodlakela kulumango kubangwa umsebenzi wokwemba ilitshe eliligugu elegolide lapho iqembu elizibiza ngokuthi ngaMashurugwi lihlasele izakhamizi ezedlula itshumi.

NgoLwesihlanu olwedluleyo kubikwa kuze izimota ezine emavinkilini eMahamba eSanco Night Club lapho amajaha ambalwa ahlasele khona uzulu ngenkemba, ingqamu lamatshe lembodlela balimaza abantu abambalwa okubalisa uMnu. Martin Khabo olisotsha kodwa ekukhefu kibo eInyathi.

Inengi ligijinyiselwe eInyathi District Hospital kwathi uKhabo wadluliselwa esibhedela seMpilo ngoba amanxeba akhe kade emabi kakhulu.

Izakhamizi zitshengise ukutshotshobala lokwesaba lapho ibandla leMRP lifika lizohlola umumo lihamba leNtathelizindaba. Umkhokheli weMthwakazi Republic Party, uMnu. Mqondisi Moyo, kanye lamalunga ebandla lakhe bayebona izakhamizi ezahlaselwayo.

UMoyo utshengise ukungajabuli ngocuku oluseBubi wathi uthole imbiko ethi umsekeli kaMongameli uMnu. Emmerson Mnangagwa uyazi ngeqembu laMashurugwi.

Uthe kusobala ukuthi ibandla leZanu-PF liyaphatheka ekusebenzeni kwaMashurugwi kundawo ezimbalwa okwembiwa khona amatshe aligugu.

UMnu. Ackim Mhlanga, unobhala obona ngobudlelwano lamanye amazwe kuMRP, uveze ukudana ngesimo esise Inyathi wathi lamapholisa akulanyathela abalithetheyo ekubopheni aMashurugwi ngoba abanye bakhona bayazakala.

ULungile Nyathi, osakhulayo odabuka eNyathi, uthe kuyadanisa ukubona abantu bokuza bezobahlukuluza wagcizelela esithi udubo yikuthi kulesandla senkokheli yebandla elibusayo osekubakhumbuza ucuku alwenziwa ngesikhathi sombhugqazwe weGukurahundi.

UMnu. Aron Mzizi, osakhulayo olaliswe esibhedlela seInyathi District, uthe ubezithokozela ebhawa waqabuka esehlaselwa ngabantu angabaziyo wonke umuntu esephaphatheka ebaleka.

Omunye njalo owahlaselwa ngaMashurugwi, UMnunzana Cosmas Sibanda, uthe abantu abamhlaselayo uyabazi kodwa lokhe bengakabanjwa loba wamangala emapholiseni.

AMashurugwi liqembu elilamalunga alitshumi lasifica munwe munye ababotshwe ngamapholisa kodwa bakhululwa. Lokhu sokukhathaze izakhamizi zeInyathi ezithi zilokudana ngendlela uhulumende asebenza ngayo ngoba abasahlalisekanga.

Amajaha la asehluphile ilizwe lonke jikelele njalo abikwa esebenzelana lenkokheli zombuswazwe zebandla elibusayo okwenza kubenzima ukuthi amapholisa ababophe.

Kuviki edluleyo kulendizamtshina ewele esiqintini seBubi ithwele igolide, kodwa indizamtshina yebutho imane yagijima yayalithatha igolide yalisa esigodlweni osekutshiye uzulu elemibuzo ukuba kwenzakalani kugatsha olubona ngezokwemba amatshe aligugu.

XS
SM
MD
LG