amalinks wokungena

Abantu Abanengi Kabalwazi Uhlelo Lwe Biometric Voter Registration


Abanye abantu kabalwazi uhlelo lweBiometric Voter Registration - BVR.

Abantu abanengi eGwanda esabelweni seMatabeleland South, ikakhulu abatsha, bathi kabazi lutho ngohlelo lokubhalisa kugwalo lokuvota olweBiometric Voter Registration (BVR) olwenziwa yikhomishini yeZimbabwe Electoral Commission (ZEC).

Lokhu sokwenze iqembu labasakhulayo lokulingisa ele Victory Siyanqoba lisebenzise imidlalo lokuhlabelela ukuze lihuge uzulu ukuyabhalisa ukuvota.

Emhlanganweni obuqoqwe yi Victory Siyanqoba ngoMgqibelo eNtepe obujonge ukufundisa abatsha ngodaba lokubhalisa ukuvota kanye lokuthula, kuphuma obala ukuthi inengi lokhe lingelalwazi ngodaba lokubhalisa ukuvota.

Umhlangano lo uqhutshelwe esikolo seNtepe engamakhilomitha angamatshumi amane usuka edolobheni leGwanda njalo bekulabatsha, osobhuku kanye lamakhansila abasuka eziqintini ezitshiyeneyo.

Umqondisi weVictory Siyanqoba Trust, uDesire Moyo, uthi sebekunanzelele ukuthi inengi kalilalwazi ngeBVR njalo sebesebenzisa imidlalo yamadrama lokuhlabelela ukuze bahuge uzulu ukuya bhalisa ukuvota.

“… Emhlubulweni wangapha welizwe abantu abala misakazo njalo akula labomabona kude okwenza kubenzima ukuthi bathole imibiko etshiyeneyo. Imibiko iyasilela kakhulu ngapha emaphandleni eGwanda okudinga ukuthi kubelenhlelo esinzenzayo njenge Victory … Siyacula, siyagida njalo sitshaya phansi kuzwele sivezela abantu uhlelo lokuvota olwe BVR. Siyakuveza lokhu kuma drama sibakhuthaza sibafaka ulukuluku lendluzula yokubana basukumele phezulu bayobhalisa”

UKhansila weNtalale, uMnu. Coster Ndlovu, uthi njengenkokheli sebethethe umthwalo wokufundisa uzulu ngodaba lokubhalisa ukuvota.

“Abantu balalo ulwazi kodwa luseselufitshane ngoba imisakazo iyakhuluma thina lathi njengobukhokheli sesihambile ezigabeni phose kuma villages onke kodwa njengoba lungakafiki loluhlelo alukafiki esigabeni sethu siyezwa ukuthi luyabuya kodwa-ke sizabe silokhu siqhubeka okwethu yikuthi abantu bathole ulwazi lokuthi kufanele baye register.”

Usobhuku weSilonga, uNkosazana Edna Ndlovu, laye obesemhlanganweni lo, uthi esigabeni sakhe uzulu sengathi uyaluzwisisa udaba lokubhalisa ukuvota ngoba lumenyezelwa lemidlalweni yenguqu.

“ESilonga abantu sebekwazi sike saba lomhlangano okaMP wakwazisa ebantwini kwakuleqembu labantu sibili. Kwesakithi isigaba abanengi bayaphatheka ngoba kulamasports wonalawo amabhora bayabuya babuthane babe banengi abanengi sebekwazi.”

UNkosazana Esther Zitha, owe Victory Siyanqoba, uthi uzulu akumelanga ayesabe ukuya vota loba seke wadala amacala phambilini.

“Abantu nxa kukhulunywa ngeBVR abanengi bezwa kuthiwa uyathathwa iphoto lefinger print, but IBVR yona leyi ayisoze iyenze khonokhuyana ukuthi ungathatha ifinger print sihle ibika zonke ndawo ukuthi umuntu lowana sekhona sesimtholile, so, khululekanini loba wake waba lecala wahamba emapholiseni wafika wabanjwa wathathwa ifinger print ungesabi ukuthi ifinger print yakho ikhona emapholiseni”

UMnu. Charms Ncube, osakhulayo oweNtalale, ngomunye othi ebengaluzwisisi udaba lwe BVR.

“Okunye engikufundileyo kade ngingakuzwisisi kakhulu yindaba leyi eye BVR ukuthi kahle kahle ihloseni ekade ngingakuzwisisi yikuqakatheka kwamafinger prints lama photos kulokuthi umuntu abuye lesithupha abhalisi”

Uhlelo lokubhalisa ukuvota luzaqala ezansi yeGwanda kumaviki amabili alandelayo mhla zilitshumi lasithupha kuLwezi.

IVictory Siyanqoba sikhiphe idlalade elikhuthaza uzulu ukuyabhalisa njalo uMoyo uthi basapheka eyinye ingoma ezahlatshelwa ngesisotho.

Facebook Forum

XS
SM
MD
LG