Inhlanganiso yeZimbabwe Democracy Institute (ZDI), abasakhulayo abakhankasela ukuthi kubuse abatsha abakunhlanganiso ye #GenerationalConsesus le Media Centre bakhuthaza uhulumende ukuthi atshiyane lomkhuba wokwethusela uzulu osebenzisa ubulembu be internet njalo evule indlela ezizenza abantu babusebenzise ngobunengi bekhululekile.
Lokhu kuvele emhlanganweni obuqoqwe yiZDI eHarare ngoLwesithathu lapho obekuhluzwa khona indlela esezisetshenziswa nguhulumende ukuhlolisisa ukuthi abantu basebenzisa njani ubulembu ezenza abantu besabe ukusebenzisa ubulembu.
Emele iZDI, inqunquthela kwezokudinga ulwazi uMnu. Bekezela Gumbo uthe umhlangano lo ubungowokunika amabandla atshiyeneyo imcijo ezabanceda ekusebenzeni azakwenza lozulu ngobulembu.
Uphinde wathi iCyber Bill engakabi ngumthetho yindlela yokwethusela uzulu ukuthi engavezi imbono yakhe ngohulumende esebenzisa ubulembu.
Emele iqembu labasakhulayo ele #Generational Consesus, uMnu. Gift Ostallos Siziba, uthe ubulembu sobulethe ukuthula, izibindi lokwehla kwendaba zokwesaba lodlakela olulethwa ngokhetho yonke iminyaka.
USiziba uphinde wathi abathi ubulembu sobulethe ubuthutha kwabatsha abakazwisisi ukuthi ukutshengisela kwalamalanga sokusenziwa njani.
Wale umbono othi abasakhulayo abenelisi ukutshengisela lokuveza imibono yabo ngendlela ezazisenzwa kudala ngenxa yobulembu asebetshona kuwo.
Isikhulumeli sebandla lentathelizindaba eleYoung Journalists Association (YOJA), uMnu. Leopold Munhende, uthe ubulembu yindawo kazulu aveza kiyo imibono yakhe.
Uhulumende ubikwa eseseduzane lokwethula umthetho ozahlola indlela uzulu asebenzisa ngazo ubulembu osekwethuse uzulu kwasolwa ngabamela amalungelo akhe.