amalinks wokungena

Breaking News

Abantu beZimbabwe Besaba Ibutho Elisemaphandleni Elihlala Lozulu


Abantu bathi ibutho leli kumele lisuswe njengoba sokulungiselelwa ukhetho oluzayo.

Kwaba lempululu, inkwelo lenjabulo ngesikhathi ibutho leZimbabwe lingena emphakathini ngemota zempi lizosusa uMnu. Robert Mugabe esihlalweni.

Imifanekiso yamaxuku abantu eHarare bebangisana ukuxhawula abebutho abanye beqabula imibhobho yinto ezahlala isengqondweni zabanengi. Abanengi bathokoziswa yikuthi ngemva kokufeza lowo msebenzi ibutho labuyela ezinkambeni.

Kodwa-ke khathesi inengi lithi liyakhathazeka ngembiko ethi ibutho seliphinda lisanda futhi endaweni zomphakathi. Abanye bathi abebutho laba abanye babo bagqoke ezabo okwenza kube nzima ukuthi babonakale. Limbiko yokwanda emphakathini ayikaqinisekiswa nguhulumende.

Loba kunjalo, inengi lithi ukubonakala kwebutho emphakathini ngesikhathi sekulungiselelwa ukhetho kubatshiyela ukukhathazeka ngokuthi kambe lolukhetho luzabe lukhululekile na.

Isakhamuzi sakoBulawayo, uMnu. Vali Phakathi, uthi okuhluphayo yikuthi imbali abayaziyo ngamasotsha eZimbabwe yikuthi minyaka yonke nxa kulokhetho ahleli egxamukela esethusela abantu ukuthi bavotele ibandla elibusayo ele Zanu PF.

“Until kuze kutshintshwe zonke izintonje amasotsha ephume kundaba yokhetho eZimbabwe angiboni kuzoba ne free and fair elections. Ama elections azo rigwa njalo ngendaba yala masotsha ayabe esenza ipolitics of the stomach.”

Esinye isizalwane seZimbabwe, uMnu. Big Foster Nkomose, uthi ukwanda kwamasotsha emphakathini okubikwa endaweni ezehlukeneyo zelizwe kuletha ukwesaba kulabo asebeke bahlukunyezwa ngamasotshala ekhethweni olwedluleyo.

“Ukhetho lweZimbabwe alungeke lube lotshintsho kulolunye ukhetho esike salubona phambilini ngoba la masotsha abantu abakhala ngawo manje aqala kudala vele. Ukuthi umbuso weZanu uphume kunzima kakhulu ngoba amasotsha ahambisana labo, amasotsha ahola kakhulu.”

UMnu. Themba Sibatha uthi ukuze ukhetho lukhululeke amasotsha wonke kuzafuze ahlale ezinkambeni kumbe ayesiza amazwe abhekane lezimpi ukuze uzulu akhankasele amabandla awafunayo kanye lokuwavotela engesabi.

“Amasotsha kufanele wona avikele uhulumende wentando yabantu. So, ma ngabe sesiwabona amasotsha ezibandakanya lokhetho, hayi thinake asikuboni kukuhle kakhulu ikakhulukazi njengoba sazi ukuthi umbuso manje vele wona usemasotsheni.”

Banengi abakhomba owayengumongameli uMnu. Robert Mugabe ngomunwe besithi okweminyaka yonke ebusa ubesebenzisa abebutho ukwethusela abantu ukuze bengavoteli amabandla abawathandayo betshiya iZanu pf.

Ngo 2008, kulembiko eminengi ekhombisa ukuthi ibutho yilo elasiza ukuthi umnumnzana Mugabe athathele owayengumkhokheli weMDCT umnumnzana Morgan Tsvangirai isihlalo ngemva kokunqoba ekhethweni lukamongameli.

Abanye ikakhulu abakweleMandebeleni ababona ibutho lihlukuluza abantu ngesikhathi seGukurahundi bathi uhulumende kufanele akunanzelele ukuthi ukubonakala kwebutho loba kungelanto embi eliyilande emphakathini kwenza abantu bacabange izigigaba zeGukurahundi besebesesaba ukwenza lokhu abakufunayo bekhululekile.

Kodwake bakhona abathi bayazikholwa izithembiso zikaMongameli Emmerson Mnangagwa zokuthi uzakwethula ukhetho olukhululekileyo.

Lokhu kulandela imibiko kamongameli esethula ukuthi ufuna wonke ofuna ukuzoqapha ezokuqhutshwa kokhetho eZimbabwe avunyelwe kugoqela lamazwe entshonalanga le Melika abesenqatshelwa ukwenza lokhu.

Udaba Esilethulelwe NguBenedict Nhlapho
please wait

No media source currently available

0:00 0:03:52 0:00

Facebook Forum

XS
SM
MD
LG