Inkulungwane lenkulungwane zabeZimbabwe ziqhubeka zingena kweleBotswana ngemva kwekhefu leKhisimusi, kulezinye izihambi eziqeda amahola afika ayisithupha zilindele ukuthola uncedo emngceleni wePlumtree.
Inengi liqhubeka lisehlela emazweni ongomakhelwane ngesikhathi umumo womnotho weZimbabwe uqhubeka usonakala.
Emgceleni wePlumtree bekungahambeki ngesikhathi inengi liphindela eBotswana kanye leSouth Africa ngemva kokuyadlala ikhefu leKhisimusi ekhaya.
Kulendwendwe ezinde zabangela maphepha okuhlala eBotswana, ama Residence Permits okutshengisa ukuthi kungaba lomphakathi omutsha osuzimisele ukuphuma elizweni ukuyadinga amathuba amatsha phandle kwelizwe.
Unkosazana Silindile Ndlovu uthi bame isikhathi eside emngceleni bengakatholi usizo lokudindisa incwadi zokuhamba njalo esithi inengi kukhanya ngeliphuma eZimbabwe okwakuqala.
Uqhubeke esithi yena inhloso ekubuyeni kwakhe eZimbabwe ekupheleni komnyaka odluleyo bekuyikuhla engasaphenduki kweleBotswana kodwa umumo umbambe ngamandla ukuthi aphindele.
Omunye obesendleleni elubhekise kweleSouth Africa umnumzana Bhekani Mathanda uthi kumgceke ukuthi isimo asimanga kahle yikho ekhaya yikho bebonakala abantu abanengi okwethusayo bekundwendwe ezinde kangaka. Ethi isimo esikhona eZimbabwe yiso esixotsha inengi ngesikhathi amakampani evalwa kutshiya inengi lingela eyinye indlela ngaphandle kokudinga okokuziphilisa kwamanye amazwe.
Noma nje kungakakhitshwa inani labasebenzise umngcele wePlumtree le Ramokgwebana ngekhefu leKhisimusi, abeBotswana bathi inani lezimota ezidluleyo lingaba phezulu okwedlula kweyinye iminyaka.