Abazali sebekhuthazwe ukuthi baphatheke ngokugcweleyo ekutholiseni abantwababo ulwazi ngendlela imizimba yabo esebenza ngayo kanye lezemacansini, ukuze bazi nxa bethe bahlukuluzwa.
Inkuthazo le yethulwe emhlanganweni oqoqwe ngabohlangothi olukhangelane lezabantwana olweChild Sensitive Programmes eHarare ngoLwesihlanu.
Uhlangothi lolu lusebenza luphansi kwekolitshi leWomen"s University in Africa.
Abakhulume amhlanganweni lo bathe abazali balomlandu omkhulu ekukhuliseni abantwababo lekubavikeleni ngokubahlomisa ngolwazi ukuze bazivikele kundaba zokuhlukuluzwa lokwendiswa besabancinyane.
Umfundisi Mazvarirashe Mabungu uthi abazali bakulezinsuku kabazikhathazi kakhulu ngokukhulumisana labantwababo ngempilo, okuyinto athi kayilunganga.
Endulo, ikakhulu obabakazi labomalume yibo babekhangelelwe ukweluleka abantwana ngempilo okugoqela indaba zemacansini lokusebenza komzimba.
Ekhuluma embuthanweni ofanayo, umkhokheli wabantwana uChild President, uSamuel Nyarenda uthi batshiywa phandle sikhathi sonke abantwana lapho kuhlelwa inhlelo eziqondane labo.
Lumbono ugcizelelwe ngukhansila weSilobela uMunashe Madanha.
