amalinks wokungena

Breaking News

'Kunzima Ukutshiya Umntwana Ekhaya Uyesebenza Kwelinye Ilizwe'


FILE - Abantwana bathola ukudla esikolo esiduzane leHarare.

Abanye abantu abasebenza phandle kwelizwe bathi kunzima kakhulu ukuhlala khatshana labantwana, ikakhulu labo abalokhe besesikolo.

Inengi labazali elingaphandle kwelizwe laxotshwa elizweni yibunzima besimo somnotho, hatshi ngokuthanda, okwabenza bafulathela abantwababo ukuyadinga okungaletha isinkwa etafuleni.

Inengi liyavuma ukuthi akulula ukondla umntwana ofunda ekhaya bona besebenza njalo behlala kwele Botswana.

UNkosazana Ireen Dube, owaqeqetsha kuzifundo zokukhuliswa kwabantwana, uthi ayisiwo mumo oqondileyo ukuthi abazali babe khatshana labantwababo, ikakhulu uma kumele belandelisise ukuthi baziphatha njani, konke esikolo kumbe sebephumile.

"Akulula ngoba ukukhulisa umntwana wakho uyabe usukubeke ezandleni zomunye umuntu. Njengo mzali, uyabe ulesifiso sokuthi ubone ukuthi ukuthi umntwana uyamncedisa kokufana lomsebenzi wesikolo owenziwa ngekhaya, kumbe ubekhona ngesikhathi esifana lama Consultation Day. Kodwa kunzima ukuthi kwenzakale kulabo abazali abangaphandle kwelizwe."

UMnu. Stanley Ncube laye uthi njengabazali abaphandle kwelizwe, bathembele kuzihlobo ukuthi ziphathise ekukhuliseni abantwana, njalo balandelisele imsebenzi yabo esikolo.

"Sithembe izihlobo zethu. Ukukhulisa umntwana kanye lokunanzelela ukuthi bayenza njani esikolo, kusezandleni zabo. Thina asilamandla amanengi ngoba singaphandle kwelizwe."

Abanye baqhatshe abantu ukuthi basale labantwana, okuyibo abancedayo, kumbe abathethe isikhundla somzali.
UMnu. Rodwell Moyo uthi akukunengi abazali abangakwenza ngoba bephume phandle kwelizwe besiyadinga okungaphilisa abantwana.

"Abantu benziwa ngumumo welizwe ukuthi baphume betshiye abantwana ekhaya. Ayisiwo mumuo oqondileyo, ngoba umzala lomzali ufisa ukuba seduze lomntwana ukuze aphathise ekukhuleni kwakhe."

Abantwana labo balesifiso sokuthi ngabe bayahlala labazali ngoba befisa ukuphathiswa lokwelulekwa ezifundweni kanye lempilweni jikelele.

Omunye walaba bantwana uDenilson Ndlovu ufisa ukuba lomzali wakhe eduzane.

"Kunzima akulula, ngoba kwesinye isikhathi uyafisa ukuncediswa ngumzali, kwezinye indawo. Njalo iziqondiso zomzali zona uyazidina, ngakho kuqhakathekile ukuba seduze labo ngezikhathi zonke."

Imihlobo yemisebenzi ngeyinye yezizatho ezenza ukuthi abazali behlale katshana labantwana, kulokuthi babathathe bazoba seduze labo.

Abanye basebenza bephiwa isikhathi esithile, okufana leminyaka embili kumbe emithathu, kuhambelana lencwadi abayipheweyo eyokuhlala lokusebenza kweleBotswana. Lokhu kutsho ukuthi angeke besuse abantwana ezikolo ekhaya, ngoba bengazi ukuthi kusasa bayabe bekuphi.

Bathwele Nzima Abazali Abalabantwana Abasala Kwele Zimbabwe
please wait

No media source currently available

0:00 0:02:57 0:00

Facebook Forum

XS
SM
MD
LG