Akulamuntu obulawe yiCovid-19 eZimbabwe ngoLwesithathu kodwa kulabangamatshumi amabili lasikhombisa, 27, ababanjwe lumkhuhlane.
Ugatsha olubona ngezempilakahle lwazise njalo ukuthi inani lasebetholakele belomkhuhlane lo selokhe ufike kulelilizwe likhwele laya kunkulungwane ezingamatshumi phose amane, 38,191.
Asebebhubhile bayinkulungwane elamakhulu edlula amahlanu, 1,565.
Abahlatshwe ijekiseni yakuqala yokwenqabela lumkhuhlane izolo bazinkulungwane ezedlula ezilitshumi lasikhombisa, 17,345.
Abahlatshwe eyesibili bazinkulungwane phose eziyisikhombisa, 6,729.
Asebehlatshwe ijekiseni yakuqala kuphela sebefike kunkulungwane ezingamakhulu phose amane, 388,021. Asebehlatshwe eyesibili njalo ingeyokucina bazinkulungwane ezingamatshumi phose ayisikhombisa, 69,992.
Kusenjalo, lanxa umkhuhlane lo ubungakahlaseli kakhulu emaphandleni, abanye bathi lokhu kulakho ukutshintsha ngoba izakhamizi ezinengi zingathathi amanyathelo okuzivikela akhuthazwa ngabezempilakahle afana lokugqoka ama-mask lokuqhelelana.
Isakhamuzi sakoBulawayo uMnu Edwin Ndlovu, yena ophatheke njalo kwezombusazwe uthi uke wethekelela emakhaya eMatopo wathola abantu bengagqize qhakala angani akulamkhuhlane okhona.
