Kulabasekeli becele leMDC elikhokhelwa nguMnu Morgan Tsvangirai abayisitshiyagalombili abamiswe emthethwandaba ngoMvulo besetheswa icala lokuphatheka ekubulaweni kwepholisa uInspector Petros Mutedza emzini weGlen View, eHarare.
Bonke bayalilandula lelicala. Ngeviki edluleyo kumiswe abasekeli balelibandla abalitshumi lambili emthethwandaba besetheswa icala elifanayo. Labo belilandula icala.
Abantu asebemiswe phambi komthethwandaba besetheswa lelicala sebefika kwabangamatshumi amabili.
Kunjalo nje, usikomitshi wamapholisa uAugustine Chihuri secunule njalo amacele womabili eMDC ngokuthi amapholisa kasoze afa asekela ibandla lezombusazwe okusobala ukubana lilenjongo yokuthuthukisa izifiso zabamhlophe elizweni.
UChihuri wethule amazwi la kungxoxo ephume kuphephandaba leHerald ngoMvulo.
Kunsukwana ezedluleyo uChihuri uchaze uMongameli Robert Mugabe njengumkhokheli owathunywa nguNkulunkulu ukubana akhokhele ilizwe leZimbabwe.
Ingcwethi ecubungula ezombusazwe uMnu Bhekilizwe Ndlovu uthi amazwi kaChihuri la aveza sobala ukuba ngempela kumele akhitshwe esikhundleni sakhe.
