amalinks wokungena

Breaking News

'Abaphume Bephele Abantu Bokuza Elokitshini leRosettenville'


Ziyatshiswa izindlu zabantu bokuza elokitshini leRosettenville kwele South Africa.
Ziyatshiswa izindlu zabantu bokuza elokitshini leRosettenville kwele South Africa.

Izakhamizi zelokitshi leRosettenville eJohannesburg kweleSouth Africa esezitshise izindlu zabakwamanye amazwe ezilitshumi lambili, zitshaya phansi ngenduku zisithi abaphume baphele lanxa umphathintambo wogatsha lwendaba zasekhaya, uMnu. Malusi Gigaba, ezikhuthaze ukuthi zimise ukuhlasela abakwamanye amazwe abetheswa umlandu wokudala amacala kuleli lokitshi.

UGigaba ubhodabhode edolobheni leJohannesburg ngoMvulo, ukhuthaze izakhamizi ukuba zibike emapholiseni nxa abokuza besephula umthetho ukuze babotshwe bayevalelwa hatshi ukufaka umthetho ezandleni zabo.

Ekhuluma ngemva kokwethekelela indawo ezinengi elokitshini leRosettenville, uMnumnzana Gigaba utshele izakhamizi zelokitshi leli ukuthi uhulumende uyaziqakathekisa kakhulu izikhalazo zazo zokuthi kulabakwamanye amazwe abadala amacala kuleli lokitshi.

Kodwa-ke ukhuthaze ukuthi kubikelwe amapholisa ngalezi izehlakalo hatshi ukuthi abakwamanye amazwe laba bahlaselwe.

“Akekho umphakathi loba ilunga lomphakathi elilelungelo lokuthatha umthetho liwufake ezandleni zalo, ngoba kufanele kuqale kuhlolisiswe insolo zonke ezetheswa labo okuthiwa badala amacala.”

Lamazwi kaGigaba athole indlebe zivaliwe kunengi lezakhamizi zaleli lokitshi ezilokhu zitshaya phansi ngentonga zisithi abathathe imitshaqana yabo baphume abakwamanye amazwe ngoba bengekela bazawukhomba olotshwala.

Omunye walabo abafuna ukuthi baphume baphele nguNkosikazi Teressa Zwane.

“Bathengisela abantwabethu izidakamizwa. Benza abantwabethu bathengise imizimba yabo. Sikhathele ngabo. Abahambe. Abahambe ngoba loba sitshela amapholisa abenziwa lutho.”

Zithwele nzima izizalwane zakwamanye amazwe elokitshini leRosettenville eJohannesburg.
Zithwele nzima izizalwane zakwamanye amazwe elokitshini leRosettenville eJohannesburg.

Kakusizo zodwa izizalwane zeNigeria ezihlaselwayo kuloludlakela. Isizalwane sakwele Malawi, uNkosazana Elubey Mwaleni, ngomunye wabatshiselwe indlu nomanje esithi akukaze kungene izidakamizwa endlini yakhe.

‘Sengiphelelwe ngamacebo. Okwamanje ngiyazula zula ngizama ukudinga imali yokuyaloja, kodwa angazi ukuthi ngizayitholaphi.”

Lokhu-ke sokutshiye bonke abakwamanye amazwe kuleli lokitshi bezibuza ukuthi iyozala nkomoni.

Isizalwane seZimbabwe, uMnumnzana Kursh Ndlovu, uthi akulunganga ukuthi kone abalutshwana besekuthiwa bonke abakwamanye amazwe yizigangi.

“Asibeni ngama brothers and sisters. Singabantu abamnyama. Sonke esilapha sizama ukuthi sidinge impilo sisizaneni. Lathi siyabe sizama ukuzophanda la eMzansi hayi ukuthi size ngobudlwangudlwangu.”

Kulezinkulungwane zezizalwane zeZimbabwe ezihlala elokitshini leRosettenville kanye lelingcelelane lalo ele Turffontein.

Udaba Esilethulwe NguBenedict Nhlapho
please wait

No media source currently available

0:00 0:02:15 0:00
Lapho esitholakala khona

XS
SM
MD
LG