amalinks wokungena

Breaking News

Abasakhulayo beGwambe Basungula Uhlelo Lokwakha Ikilinika


Isikolo seGwambe Secondary School

Kulequla labatsha beZimbabwe abaseSouth Africa abadabuka koGwambe ePlumtree asebesungule uhlelo lokuzakhela ikilinika kule ndawo ngemva kokubona ubunzima obuhlangana lezakhamizi nxa zisiyadinga ukwelatshwa. Abatsha laba abenhlanganiso ye Gwambe Community Development Trust, bathi ngemva kokufeza ezinye inhlelo zentuthuko ezisemqoka esigabeni sabo, baleqiniso lokuthi lekilinika bazayakha kusizakale abanengi.

Kulezi insuku inkulumo ezingundabamlonyeni mayelana labantu beSikhalangeni yikuthi abafundanga njalo bagangile kulandela inkulumo kamongameli Mugabe.

Lokhuke yinto ephikiswa liqula labatsha abadabuka koGwambe ePlumtree abasebenza kwele South Africa. Intshale isibumbe inhlanganiso abayibiza ngokuthi yi Gwambe Community Development Trust, ngenhloso yokuthuthukisa indawo yakubo.

Ilunga lale inhlanganiso umnumnzana Maclean Nkomo uthi ngemva kokuba izakhamizi zeGwambe zibambiseni eminyakeni edluleyo zadonsela amagetsi eGwambe Secondary zabuya zakha lebholoho, okwamanje sezicabange ukwakha ikilinika.

UNkomo uthi sebeqalile ukuqoqa imali yokwakha ikilinika yabo lobanje besamelele inhlelo zekhansili ezizakutsho ukuthi yakhiwe kuphi.

Izakhamizi zalumango zithi zithwala amagabha avuzayo nxa sekukhona ogulayo loba oselunywe yinyoka. Izibhedlela abacina besiyakuzo yiMathole, iSikhathini kumbe iKhansili kodwa zonke umuntu uhamba inyawo zize zingene esiswini.

Isakhamuzi sale indawo umnumnzana Sidwell Moyo ohlala esigabeni sakoHanyana, uthi bawemukela ngezandla zombini umbono wokuthi kube lesibhedlela.

Le yinto egcizelelwa ngesinye isakhamuzi unkosazana Thokozani Mabele yena othi kuba lusizi kakhulu kubomama abazithweleyo labantwana njengoba lemota zokugada usiya esibhedlela kulilihlo lentwana.

Unkosazana Mabele unxusa zonke izakhamizi zale indawo ezisemakhaya leziphandle kwelizwe ukuthi zincedisane lequla le Gwambe Community Development Trust ekhwakheni isibhedlela lesi okuyinto athi izaphucula ezempilakahle endaweni yabo.

Umnumnzana Nkomo uthi izakhamizi zingasiza ngezinto ezifana lezitina, inhlabathi lamanzi okuzafuneka ngesikhathi sekusakhiwa. Uthi akathandabuzi ukuthi zonke izakhamizi zizabambisana ukufeza leli phupho.

Uthike njengoba kuthiwa abafundanga, bazathi beqeda ukwakha isibhedlela bakhe ezinye izikolo ukuze abantwababo bakhule besaziwa njengezikhwicamfundo.

XS
SM
MD
LG